By ខេត្តកោះកុង – លោក ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ ឈី វ៉ា អភិបាលខេត្តកោះកុង បានធ្វើដំណើរទស្សនកិច្ចសិក្សាលើកោះទទឹងរីស្សត ដើម្បីពិនិត្យការអភិវឌ្ឍរបស់ក្រុមហ៊ុន ដែននគរ (ខេមូឌា) អ៊ិនវេសមិន ឯ.ក.។
ក្នុងឱកាសនេះ លោករដ្ឋមន្ត្រីបានថ្លែងការកោតសរសើរចំពោះក្រុមហ៊ុនខ្មែរដែលបានចូលរួមអភិវឌ្ឍកោះទទឹងជារមណីយដ្ឋានទេសចរណ៍កម្រិតខ្ពស់ ដើម្បីទាក់ទាញភ្ញៀវទេសចរទាំងជាតិ និងអន្តរជាតិ។
លោករដ្ឋមន្ត្រីបានណែនាំឱ្យក្រុមហ៊ុនយកចិត្តទុកដាក់លើការអភិរក្សធនធានធម្មជាតិ ដោយអនុវត្តទស្សនៈ «ការអភិរក្ស បម្រើឱ្យការអភិវឌ្ឍ និងការអភិវឌ្ឍ បម្រើឱ្យការអភិរក្ស»។
លោកក៏បានលើកទឹកចិត្តឱ្យក្រុមហ៊ុនស្នើសុំវិញ្ញាបនបត្រស្តង់ដារជាច្រើន រួមមានសណ្ឋាគារបៃតងកម្ពុជា ស្តង់ដាអាស៊ាន និងវិញ្ញាបនបត្រសម្រាប់ទេសចរចិន និងម៉ូស្លីម ដើម្បីបង្ហាញគុណភាពសេវាកម្ម។
សមាគមទេសចរណ៍ដូចជា CATA, CTF និង PATA ត្រូវបានណែនាំឱ្យពិនិត្យលទ្ធភាពដាក់បញ្ចូលកោះទទឹងក្នុងកញ្ចប់ទស្សនកិច្ចសម្រាប់ភ្ញៀវកម្រិតខ្ពស់។
លោករដ្ឋមន្ត្រីក៏បានលើកទឹកចិត្តឱ្យ Influencers និង KOLs ចូលរួមផ្សព្វផ្សាយអំពីកោះទទឹងរីស្សត និងតំបន់ទេសចរណ៍ផ្សេងៗក្នុងខេត្តកោះកុង។
នៅចុងបញ្ចប់ លោករដ្ឋមន្ត្រីបានប្រគល់លិខិតសរសើរដល់ក្រុមហ៊ុន ដើម្បីទទួលស្គាល់ការខិតខំប្រឹងប្រែងក្នុងការអភិវឌ្ឍ និងលើកកម្ពស់គុណភាពសេវាកម្មទេសចរណ៍។
កោះទទឹងរីស្សតត្រូវបានគេរំពឹងថានឹងក្លាយជាផលិតផលទេសចរណ៍ថ្មីដែលមានតម្លៃបន្ថែមខ្ពស់ក្នុងវិស័យឧស្សាហកម្មទេសចរណ៍កម្ពុជា។
កោះទទឹង, ខេត្តកោះកុង ថ្ងៃទី២៣ ខែមីនា ឆ្នាំ២០២៦
ប្រភព៖ ក្រសួងទេសចរណ៍
