By ភ្នំពេញ៖ សមត្ថកិច្ចនគរបាលបានឃាត់ខ្លួនក្មេងទំនើង២នាក់ក្នុងចំណោមបក្ខពួក៥នាក់ ក្រោយពីពួកគេបានធ្វើសកម្មភាពដេញវាយកាប់គ្នាទៅវិញទៅមកនៅតំបន់សែនសុខ។
ការឃាត់ខ្លួនជនសង្ស័យទាំង២នាក់នេះបានកើតឡើងនៅវេលាម៉ោង១២:៣៥នាទី ថ្ងៃទី២៥ ខែមីនា ឆ្នាំ២០២៦ នៅភូមិទ្រង់មាន់ សង្កាត់អូរបែកក្អម ខណ្ឌសែនសុខ។ ជនសង្ស័យទី១ឈ្មោះ ច័ន្ទ តារ៉ាដាវីដ អាយុ១៨ឆ្នាំ និងទី២ឈ្មោះ ហុង ដាវីន អាយុ១៧ឆ្នាំ ស្នាក់នៅសង្កាត់កាកាប ខណ្ឌពោធិ៍សែនជ័យ។
តាមការបញ្ជាក់ពីសមត្ថកិច្ចនគរបាលប៉ុស្តិ៍អូរបែកក្អម កាលពីថ្ងៃទី២៤ វេលាម៉ោងប្រហែល៤រសៀល ក្រុមក្មេងទំនើងទាំង២ក្រុមបានបើកការដេញវាយកាប់គ្នានៅកន្លែងផ្ទះលក់កាហ្វេមួយកន្លែង ដោយបណ្តាលឱ្យមានការខូចខាតទូរកល់ឥវ៉ាន់របស់ម្ចាស់ផ្ទះ។ ពួកគេបានរត់គេចបាត់អស់ក្រោយពីកើតហេតុ។
លុះដល់ព្រឹកថ្ងៃទី២៥ សមត្ថកិច្ចបានស្រាវជ្រាវឃាត់ខ្លួនបានទាំង២ក្រុម ប៉ុន្តែក្នុង១ក្រុមជាត់បានតែម្នាក់។ សមត្ថកិច្ចកំពុងតាមស្រាវជ្រាវរកបក្ខពួកដែលនៅសល់។
បច្ចុប្បន្ន ជនសង្ស័យទាំង២នាក់ត្រូវបានបញ្ជូនទៅអធិការដ្ឋាននគរបាលខណ្ឌសែនសុខ ដើម្បីចាត់ការបន្តតាមនីតិវិធីច្បាប់។
សមត្ថកិច្ចនៅតែបន្តស្រាវជ្រាវដើម្បីរកជនសង្ស័យដែលនៅសល់ និងធ្វើការស៊ើបអង្កេតលម្អិតអំពីមូលហេតុនៃការប៉ះទង្គិចគ្នានេះ។
ដោយ៖ ចន្ទ លីហ្សា
