ចាប់ខ្លួនជនជាតិវៀតណាម ១០នាក់ទៀត ពាក់ព័ន្ធនឹងការឆបោកអនឡាញនៅច្បារអំពៅ

ភ្នំពេញ៖ កម្លាំងសមត្ថកិច្ចបានធ្វើប្រតិបត្តិការបង្ក្រាបទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធអនឡាញ (Online Scams) នៅសង្កាត់ព្រែកប្រា ខណ្ឌច្បារអំពៅ កាលពីថ្ងៃទី២៤ មីនា ២០២៦។

ប្រតិបត្តិការនេះធ្វើឡើងក្រោមការដឹកនាំផ្ទាល់ពីលោក ឃួង ស្រេង អភិបាលរាជធានីភ្នំពេញ និងឧត្តមសេនីយ៍ ឯក ជួន ណារិន្ទ ស្នងការនគរបាលរាជធានីភ្នំពេញ។ ការចុះប្រតិបត្តិការត្រូវបានអនុវត្តនៅផ្ទះលេខ១៦០ ផ្លូវលេខ៣៦៩ ភូមិអូរអណ្ដូង១ បន្ទាប់ពីមានការសង្ស័យលើសកម្មភាពរបស់ជនបរទេស។

ជាលទ្ធផល អាជ្ញាធរបានចាប់ខ្លួនជនជាតិវៀតណាមចំនួន ១០នាក់ និងដកហូតសម្ភារៈប្រើប្រាស់ក្នុងសកម្មភាពបទល្មើស រួមមាន៖ កុំព្យូទ័រប្រភេទ All-in-one ៩គ្រឿង, ម៉ាស៊ីន CPU ៤គ្រឿង, អេក្រង់ Monitor ៣គ្រឿង និងទូរសព្ទដៃ ១០គ្រឿង។

តាមការពិនិត្យជាក់ស្ដែង ទីតាំងនេះពាក់ព័ន្ធនឹងបទល្មើស “កម្ចីប្រាក់ខុសច្បាប់”។ បច្ចុប្បន្ន អាជ្ញាធរបានបិទឃ្លុំទីតាំងជាបណ្ដោះអាសន្ន ហើយជនល្មើសទាំង ១០នាក់ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញដើម្បីសាកសួរ និងកសាងសំណុំរឿងតាមច្បាប់។

តាមរបាយការណ៍របស់គណៈកម្មការប្រឆាំងការឆបោកតាមប្រព័ន្ធបច្ចេកវិទ្យា ចាប់ពីឆ្នាំ២០២៥ ដល់មីនា ២០២៦ អាជ្ញាធរបានបង្ក្រាប និងបិទសៀលទីតាំងសង្ស័យសរុប ២៣៦ ទីតាំង ក្នុងនោះមានទីតាំងកាស៊ីណូ ៩១ ទីតាំង និងអគារលំនៅឋាន ១៤៥ ទីតាំង។

ក្រសួងយុត្តិធម៌បានរាយការណ៍ថា ក្នុងរយៈពេល ៨ខែចុងក្រោយ តុលាការបានផ្តន្ទាទោសមេខ្លោង និងបក្ខពួកចំនួន ៦៩៧នាក់ ពីសំណុំរឿងឆបោកអនឡាញ ៧៩ សំណុំរឿង។ អាជ្ញាធរក៏បានកត់សម្គាល់ថា មេខ្លោង និងអ្នកពាក់ព័ន្ធជាង ២២ម៉ឺននាក់បានគេចខ្លួនចេញពីប្រទេសកម្ពុជា។