ប្រទេសឈូងសមុទ្រទាមទារសំណងពេញលេញពីអ៊ីរ៉ង់ ក្រោយការវាយប្រហារបំពានលើអធិបតេយ្យភាព

ហ្សឺណែវ – ប្រទេសនៅតំបន់ឈូងសមុទ្រពែរ្សបានចេញមុខទាមទារសំណងពេញលេញពីអ៊ីរ៉ង់ បន្ទាប់ពីការវាយប្រហាររបស់ទីក្រុងតេហេរ៉ង់ដែលពួកគេចាត់ទុកថាជាការរំលោភបំពានយ៉ាងធ្ងន់ធ្ងរលើអធិបតេយ្យភាព។

ក្នុងកិច្ចប្រជុំបន្ទាន់នៃក្រុមប្រឹក្សាសិទ្ធិមនុស្សអង្គការសហប្រជាជាតិ (UN) នៅទីក្រុងហ្សឺណែវ លោក Abdulmohsen Majed bin Khothaila តំណាងអារ៉ាប៊ីសាអូឌីតបានថ្កោលទោសយ៉ាងខ្លាំងចំពោះសកម្មភាពរបស់អ៊ីរ៉ង់។

«រដ្ឋជាសមាជិកក្រុមប្រឹក្សាសហប្រតិបត្តិការឈូងសមុទ្រ (GCC) កំពុងរងការវាយប្រហារ ទោះបីជាមិនពាក់ព័ន្ធនឹងជម្លោះក៏ដោយ» លោកបានអះអាងក្នុងសម័យប្រជុំ។

លោកបន្តថា៖ «ការវាយប្រហាររបស់អ៊ីរ៉ង់បានរំលោភលើធម្មនុញ្ញអង្គការសហប្រជាជាតិ និងច្បាប់អន្តរជាតិនានា។ ការកំណត់គោលដៅលើប្រទេសជិតខាងគឺជាការរំលោភលើគោលការណ៍នៃទំនាក់ទំនងល្អជាមួយប្រទេសជិតខាង។»

ក្រុមប្រឹក្សាសិទ្ធិមនុស្សដែលមានសមាជិក៤៧រូបបានគាំទ្រសេចក្តីសម្រេចរួមដែលថ្កោលទោសសកម្មភាពរបស់អ៊ីរ៉ង់ ដែលមានគោលបំណងបិទច្រកសមុទ្រ Hormuz។

សេចក្តីសម្រេចនេះទាមទារឱ្យអ៊ីរ៉ង់បញ្ឈប់ការវាយប្រហារទាំងអស់ជាបន្ទាន់ និងផ្តល់សំណងពេញលេញដល់ជនរងគ្រោះ។

សម័យប្រជុំនេះកើតឡើងក្នុងពេលដែលសង្គ្រាមរវាងសហរដ្ឋអាមេរិក-អ៊ីស្រាអែលលើអ៊ីរ៉ង់ខិតជិតចូល១ខែទៅហើយ ដោយអ៊ីរ៉ង់នៅតែបន្តវាយប្រហារដោយមីស៊ីលនិងដ្រូននៅទូទាំងតំបន់មជ្ឈិមបូព៌ា។

ការសម្របសម្រួលដោយអន្តរជាតិកំពុងត្រូវបានបន្តដើម្បីបញ្ចប់ជម្លោះដ៏សាហាវនេះ ខណៈដែលប្រទេសឈូងសមុទ្រនៅតែរឹងមាំក្នុងតម្រូវការសំណងពីអ៊ីរ៉ង់។