ត្រាំប្រកាសទទួលបានកាដូដ៏ធំពីអ៊ីរ៉ង់ សម្រាប់ដោះស្រាយវិស័យប្រេង ឧស្ម័ន និងច្រកសមុទ្រ

លោកប្រធានាធិបតី ដូណាល់ ត្រាំ បានធ្វើឲ្យពិភពលោកចាប់អារម្មណ៍យ៉ាងខ្លាំង កាលពីថ្ងៃអង្គារទី២៤ ខែមីនា ដោយលោកបានបង្ហាញថា អ៊ីរ៉ង់បានផ្ដល់«កាដូដ៏ធំបំផុត»មួយដែលទាក់ទងនឹងវិស័យប្រេង ឧស្ម័ន និងច្រកសមុទ្រ Hormuz។

លោកត្រាំបានបង្ហាញក្ដីសង្ឃឹមយ៉ាងខ្លាំងលើការចរចា ដើម្បីបញ្ចប់សង្គ្រាមដែលបានអូសបន្លាយពេល៤សប្តាហ៍មកនេះ។ លោកអះអាងថា វ៉ាស៊ីនតោនកំពុងដើរលើផ្លូវត្រូវ និងបានជួបចរចាជាមួយ«មនុស្សត្រូវ» ទោះបីជាទីក្រុងតេហេរ៉ង់បដិសេធថាមិនបានចូលរួមក៏ដោយ។

សញ្ញាវិជ្ជមាននេះបានកើតឡើងបន្ទាប់ពីលោកត្រាំសម្រេចផ្អាកការវាយប្រហារលើហេដ្ឋារចនាសម្ព័ន្ធថាមពលអ៊ីរ៉ង់។ លោកបញ្ជាក់ថា កាដូនេះមិនមែនជារឿងអាវុធនុយក្លេអ៊ែរទេ ប៉ុន្តែអ៊ីរ៉ង់បានយល់ព្រមមិនផលិតអាវុធនុយក្លេអ៊ែរជារៀងរហូត។

ក្រោយមរណភាពមេដឹកនាំ Ali Khamenei លោកត្រាំនិយាយថា របបដឹកនាំអ៊ីរ៉ង់បានផ្លាស់ប្តូរទាំងស្រុង។ បច្ចុប្បន្ន ក្រុមការងារជាន់ខ្ពស់អាមេរិក រួមមានអនុប្រធានាធិបតី JD Vance និងលោក Jared Kushner កំពុងធ្វើការយ៉ាងមមាញឹក។

ទោះជាយ៉ាងណា បរិយាកាសនយោបាយនៅតែតានតឹង។ ខណៈលោកត្រាំព្យាយាមចរចា រដ្ឋមន្ត្រីការពារជាតិលោក Pete Hegseth បែរជាបង្ហាញជំហរតឹងរឹង ដោយលើកឡើងថា«ចរចាដោយប្រើគ្រាប់បែក»។ រដ្ឋបាលលោកត្រាំនៅតែបន្តជំរុញឲ្យមានកិច្ចព្រមព្រៀង ដើម្បីបើកច្រកសមុទ្រយុទ្ធសាស្ត្រ Hormuz ឡើងវិញ និងធ្វើឱ្យតម្លៃប្រេងមានស្ថិរភាព។