ក្រុមហ៊ុនបារាំង Total Energies ជួបរដ្ឋមន្ត្រីក្រសួងរ៉ែ សន្យាបន្តគាំទ្រកម្ពុជា ទោះបីជាសង្គ្រាមបណ្តាលឱ្យខ្វះខាតឧស្ម័ន

ភ្នំពេញ៖ នៅថ្ងៃទី២៦ ខែមីនា ឆ្នាំ២០២៦ លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានជួបពិភាក្សាជាមួយអនុប្រធានក្រុមហ៊ុនបារាំង Total Energies ដើម្បីដោះស្រាយបញ្ហាប្រេង និងឧស្ម័នដែលកំពុងប៉ះពាល់ដល់កម្ពុជា។

លោករដ្ឋមន្ត្រីបានបញ្ជាក់ថា Total Energies ជាអ្នកផ្គត់ផ្គង់ឧស្ម័ន LPG ដ៏សំខាន់នៅតំបន់អាស៊ី ជាពិសេសនៅវៀតណាម និងឥណ្ឌា ដែលបច្ចុប្បន្នកំពុងជួបការខ្វះខាតយ៉ាងធ្ងន់ធ្ងរដោយសារសង្គ្រាម។ ក្រុមហ៊ុនបារាំងនេះបានសន្យាថានឹងបន្តខិតខំគាំទ្រកម្ពុជាឱ្យបានអស់លទ្ធភាព។

ក្រុមហ៊ុនបានជំរុញឱ្យអ្នកប្រើប្រាស់នៅកម្ពុជាជួយសន្សំសំចៃថាមពលឱ្យអស់លទ្ធភាព ខណៈសង្គ្រាមនៅបន្ត។ ទោះបីជាតម្លៃប្រេងម៉ាស៊ូត និងសាំងបានកើនឡើងក៏ដោយ ក៏ស្ថានភាពនៅមានលទ្ធភាពគ្រប់គ្រាន់ជាងឧស្ម័ន LPG ដែលកំពុងខ្វះខាតយ៉ាងខ្លាំង។

លោក កែវ រតនៈ បានអះអាងថា រដ្ឋាភិបាលនឹងបន្តធ្វើការជាមួយដៃគូអន្តរជាតិដើម្បីធានាការផ្គត់ផ្គង់ថាមពលដល់ប្រជាពលរដ្ឋកម្ពុជា។ ក្រុមហ៊ុន Total Energies ក៏បានសន្យាថានឹងរកមធ្យោបាយគ្រប់យ៉ាងដើម្បីធានាការផ្គត់ផ្គង់ថាមពលដល់កម្ពុជា ទោះបីជាមានឧបសគ្គអន្តរជាតិក៏ដោយ។

ដោយ៖ តារា