By ភ្នំពេញ៖ ករណីលោតសម្លាប់ខ្លួនរបស់ជនបរទេសម្នាក់ បានបង្កឱ្យមានការភ្ញាក់ផ្អើលយ៉ាងខ្លាំង នៅព្រឹកថ្ងៃទី២៥ ខែមីនា ឆ្នាំ២០២៦ នៅអាផាតមិន Bellavita ក្នុងសង្កាត់បឹងកេងកងទី១ ខណ្ឌបឹងកេងកង។
តាមការបញ្ជាក់ពីពលរដ្ឋម្នាក់ដែលជាអ្នកលក់កាហ្វេនៅក្បែរនោះ បានឱ្យដឹងថា នៅវេលាម៉ោងប្រហែល ៦ព្រឹក គាត់បានដើរយកកាហ្វេឱ្យភ្ញៀវ ហើយបានប្រទះឃើញសពបុរសជនជាតិបរទេសម្នាក់ ស្លៀកកន្សែង ស្លាប់ក្បែរម៉ាស៊ីនភ្លើងរបស់អគារអាផាតមិន។
ប្រជាពលរដ្ឋបានទំនាក់ទំនងទៅកាន់មន្ត្រីមូលដ្ឋានភ្លាម ដើម្បីអន្តរាគមន៍។ តាមប្រភពពីនគរបាលបានឱ្យដឹងថា យោងតាមកាមេរ៉ាសុវត្ថិភាព ជនជាតិបរទេសនេះបានលោតសម្លាប់ខ្លួនតាំងពីវេលាម៉ោង ៣ទៀបភ្លឺ។
ក្រោយកើតហេតុ សមត្ថកិច្ចមូលដ្ឋានរួមជាមួយមន្ត្រីជំនាញចក្ខុកោសល្យវិច័យ បានចុះត្រួតពិនិត្យ រួចយកសពទៅតម្កល់នៅវត្តទឹកថ្លា រង់ចាំសាច់ញាតិមកទទួលធ្វើបុណ្យតាមប្រពៃណី។
អាផាតមិន Bellavita ដែលកើតហេតុស្ថិតនៅលើបណ្តោយផ្លូវលេខ៥៧ កែងផ្លូវ២៧៨ ជាតំបន់ដែលមានអាគារខ្ពស់ៗ និងមានអ្នករស់នៅច្រើន។ ករណីនេះបានធ្វើឱ្យប្រជាពលរដ្ឋនៅក្បែរនោះមានការភ័យខ្លាច និងភ្ញាក់ផ្អើលយ៉ាងខ្លាំង។
សមត្ថកិច្ចនៅតែបន្តស៊ើបអង្កេតពីមូលហេតុនៃការលោតសម្លាប់ខ្លួន និងអត្តសញ្ញាណរបស់ជនបរទេសនោះ។ ការស៊ើបអង្កេតបន្ថែមនឹងត្រូវធ្វើឡើង ដើម្បីរកឃើញមូលហេតុពិតប្រាកដនៃឧប្បត្តិហេតុនេះ។
