By ខេត្តស្វាយរៀង – សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសពីយុទ្ធសាស្ត្រថ្មីក្នុងការអភិវឌ្ឍខេត្តស្វាយរៀង និងតំបន់ខាងកើតឱ្យក្លាយជាតំបន់ឧស្សាហកម្ម និងកសិ-ឧស្សាហកម្មដ៏សក្តានុពល។
ក្នុងពិធីសម្ពោធដាក់ឱ្យដំណើរការជាផ្លូវការនៃរោងចក្រប្រព្រឹត្តកម្មទឹកស្អាតអណ្តូងតាសី ក្រុងស្វាយរៀង និងពិធីបើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធទឹកស្អាតបន្ថែមសម្រាប់ខេត្តចំនួន៥ នៅព្រឹកថ្ងៃទី២៦ ខែមីនា ឆ្នាំ២០២៦ សម្តេចធិបតីបានចែងថា៖ “ខេត្តស្វាយរៀងមានសក្តានុពលសេដ្ឋកិច្ចដ៏ធំ ហើយរាជរដ្ឋាភិបាលកំពុងជំរុញការវិនិយោគលើវិស័យកសិ-ឧស្សាហកម្ម និងឧស្សាហកម្មដើម្បីទាក់ទាញរោងចក្រ និងសហគ្រាសផ្សេងៗ។”
សម្តេចបានលើកឡើងពីកិច្ចសហប្រតិបត្តិការរវាងកម្ពុជា និងជប៉ុនក្នុងការអភិវឌ្ឍហេដ្ឋារចនាសម្ព័ន្ធ ដោយថ្ងៃនេះទាំងពីរប្រទេសបានរួមគ្នាសម្ពោធបើកដំណើរការជាផ្លូវការនៃវិស័យទឹកស្អាតសម្រាប់ប្រជាជនខេត្តស្វាយរៀង។
សម្តេចធិបតីនាយករដ្ឋមន្ត្រីបានបញ្ជាក់ថា រាជរដ្ឋាភិបាលកំពុងរៀបចំកម្ពុជាឱ្យក្លាយជាប្រទេសអភិវឌ្ឍ ដោយឈរលើសមត្ថភាពរបស់ប្រជាជនខ្មែរ ជាពិសេសយុវជនដែលមានចំណេះដឹង និងជំនាញក្នុងគ្រប់វិស័យ។ កម្ពុជាកំពុងអនុវត្តយុទ្ធនាការសកម្មក្នុងការបោសសម្អាតភាពអសកម្ម និងសកម្មភាពឆបោកតាមប្រព័ន្ធបច្ចេកវិទ្យា ដើម្បីធានាសន្តិសុខ និងសណ្តាប់ធ្នាប់សង្គម។
សម្តេចបានគូសបញ្ជាក់ថា រាជរដ្ឋាភិបាលមានយុទ្ធសាស្ត្រច្បាស់លាស់សម្រាប់អភិវឌ្ឍសង្គម-សេដ្ឋកិច្ចជាតិ ដោយផ្តោតលើការលើកកម្ពស់សេដ្ឋកិច្ចបៃតង ការពង្រឹងអភិបាលកិច្ចបរិស្ថាន និងការវិនិយោគលើហេដ្ឋារចនាសម្ព័ន្ធដែលអាចឆ្លើយតបទៅនឹងតម្រូវការបច្ចុប្បន្ន និងអនាគត។
រាជរដ្ឋាភិបាលនឹងបន្តវិនិយោគលើហេដ្ឋារចនាសម្ព័ន្ធគន្លឹះ រួមទាំងការផ្គត់ផ្គង់ទឹកស្អាត អនាម័យ និងប្រព័ន្ធគ្រប់គ្រងសំណល់នៅទូទាំងប្រទេស ស្របតាមទិសស្លោក «ទីណាមានទឹកស្អាត ទីនោះនឹងមានការផ្លាស់ប្តូរជាសេដ្ឋកិច្ច»។
ដោយ៖ សិលា
