By ខេត្តកណ្ដាល៖ នគរបាលស្រុកកណ្ដាលស្ទឹងបានឃាត់ខ្លួនជនសង្ស័យម្នាក់ក្នុងព្រឹត្តិការណ៍ចម្លែក ដែលជនសង្ស័យបានកាប់ខ្លួនឯងក្រោយពីចូលទៅហាងរបស់ជនរងគ្រោះដែលជាជាងបាញ់ថ្នាំឡានជនជាតិចិន។
ព្រឹត្តិការណ៍នេះបានកើតឡើងនៅថ្ងៃទី២៤ ខែមីនា ឆ្នាំ២០២៦ នៅភូមិក្រាំងទ្រា ឃុំព្រះពុទ្ធ ស្រុកកណ្ដាលស្ទឹង។ ជនរងគ្រោះឈ្មោះ MA RONGZHAI អាយុ៤៩ឆ្នាំ ជនជាតិចិន មានហាងបាញ់ថ្នាំឡាននៅក្នុងតំបន់។ ចំណែកជនសង្ស័យឈ្មោះ ចាន់ រ៉ា អាយុ៤៣ឆ្នាំ គឺជាប្តីរបស់កម្មករិនីដែលធ្វើការនៅហាងនេះ។
តាមការបំភ្លឺពីប្រពន្ធជនរងគ្រោះ នាងបានបញ្ឈប់ការងាររបស់ស្ត្រីឈ្មោះ សុគន្ធ សុខា (ប្រពន្ធជនសង្ស័យ) ហើយមិនទាន់បានទូទាត់ប្រាក់ខែ២២០ដុល្លារ។ នៅថ្ងៃកើតហេតុ ជនសង្ស័យបានចូលទៅក្នុងហាងដោយកាន់កាំបិតប៉័ងតោ ហើយបានយារកាំបិតដាក់ខ្លួនឯងមុននឹងកាប់ខ្លួនឯងចំនួន៤កន្លែងនៅទ្រូង។
នគរបាលបានចាប់យកកាំបិតប៉័ងតោមួយផ្លែដែកដងជ័រពណ៌ខ្មៅ ប្រវែង៣២សង់ទីម៉ែត្រ ជាវត្ថុតាង។ ជនសង្ស័យបានសារភាពថា ខ្លួនពិតជាបានកាប់ខ្លួនឯង ហើយបច្ចុប្បន្នកំពុងត្រូវឃាត់ខ្លួននៅអធិការដ្ឋាននគរបាលស្រុកកណ្ដាលស្ទឹង ដើម្បីកសាងសំណុំរឿងតាមនីតិវិធី។
