By 
ភាពតានតឹងនៅមជ្ឈិមបូព៌ាកំពុងកើនឡើងខ្ពស់ បន្ទាប់ពីអ៊ីរ៉ង់រាយការណ៍ថា សហរដ្ឋអាមេរិក និងអ៊ីស្រាអែល បានធ្វើការវាយប្រហារលើតំបន់ជុំវិញរោងចក្រថាមពលនុយក្លេអ៊ែរ Bushehr នៅយប់ថ្ងៃអង្គារ ទី២៤ មីនា ២០២៦។
យោងតាមទីភ្នាក់ងារព័ត៌មានរដ្ឋ IRNA របាយការណ៍បឋមបង្ហាញថា មិនមានការខូចខាតបច្ចេកទេសដល់រោងចក្រ ហើយក៏មិនមានអ្នករងរបួស ឬបាត់បង់ជីវិតដែរ។
ទីភ្នាក់ងារថាមពលអាតូមិកអន្តរជាតិ (IAEA) បានបញ្ជាក់ថា ពួកគេបានទទួលដំណឹងពីអ៊ីរ៉ង់អំពីគ្រាប់រ៉ុក្កែត ឬមីស៊ីលដែលធ្លាក់ក្នុងបរិវេណរោងចក្រ។ ទោះជាយ៉ាងណា អង្គការ IAEA បានបញ្ជាក់តាមបណ្តាញសង្គម X ថា ប្រតិបត្តិការរបស់រោងចក្រនៅតែដំណើរការធម្មតា ដោយគ្មានការខូចខាតដល់រចនាសម្ព័ន្ធស្នូល ឬប៉ះពាល់ដល់បុគ្គលិកឡើយ។
គួរកត់សម្គាល់ថា នេះជាលើកទីពីរហើយក្នុងរយៈពេលតែ១សប្តាហ៍ ដែលមានការវាយប្រហារក្បែររោងចក្រនុយក្លេអ៊ែរនេះ បន្ទាប់ពីហេតុការណ៍ស្រដៀងគ្នាបានកើតឡើងនៅថ្ងៃទី១៧ មីនា។
ក្នុងពេលដែលស្ថានការណ៍កាន់តែតានតឹងនេះ លោក Rafael Mariano Grossi អគ្គនាយក IAEA បានអំពាវនាវយ៉ាងទទូចឱ្យគ្រប់ភាគីអត់ធ្មត់ឱ្យបានខ្ពស់បំផុត។ លោកបានសង្កត់ធ្ងន់ថា វាចាំបាច់ខ្លាំងណាស់ក្នុងការជៀសវាងរាល់ហានិភ័យដែលអាចប៉ះពាល់ដល់សុវត្ថិភាពនុយក្លេអ៊ែរ ក្នុងអំឡុងពេលដែលជម្លោះនៅតែបន្ត។
