ឧបនាយករដ្ឋមន្ត្រី ហង់ជួន ណារ៉ុន អធិបតីពិធីប្រកាសតំណែងប្រធានមន្ទីរអប់រំខេត្តក្រចេះ

ខេត្តក្រចេះ៖ នាព្រឹកថ្ងៃទី២៥ មីនា ២០២៦ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីប្រកាសចូលកាន់តំណែងរបស់លោក ធាម ហេង ជាប្រធានមន្ទីរអប់រំ យុវជន និងកីឡាខេត្តក្រចេះ។

ក្នុងពិធីដ៏ខ្ពង់ខ្ពស់នេះ មានការអញ្ជើញចូលរួមពីសំណាក់លោកប្រធានក្រុមប្រឹក្សាខេត្ត លោកអភិបាលគណៈអភិបាលខេត្តក្រចេះ ថ្នាក់ដឹកនាំក្រសួងអប់រំ សមាជិកក្រុមប្រឹក្សាខេត្ត តំណាងអង្គភាពជុំវិញខេត្ត នាយក-នាយិកា គ្រូបង្រៀន និងបុគ្គលិកអប់រំ។

លោកឧបនាយករដ្ឋមន្ត្រីបានអបអរសាទរដល់លោក ធាម ហេង ចំពោះការតែងតាំងថ្មី និងលើកឡើងពីគោលនយោបាយរបស់រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា ដែលផ្តោតលើការពង្រឹងសមត្ថភាពស្ថាប័ន និងសមត្ថភាពមន្ត្រីរាជការ។

លោកឧបនាយករដ្ឋមន្ត្រីបានរំលេចពីកំណែទម្រង់គោលនយោបាយអប់រំដើម្បីលើកកម្ពស់គុណភាពអប់រំ រួមមានការបង្កើនបៀវត្សគ្រូបង្រៀន ទាក់ទាញអ្នកមានសមត្ថភាព និងលើកស្ទួយកិត្តិយសគ្រូបង្រៀន។

កំណែទម្រង់សាលារៀនក៏ត្រូវបានលើកឡើងដែរ រួមមានការកែលម្អភាពជាអ្នកដឹកនាំរបស់នាយក ការលើកកម្ពស់លទ្ធផលសិស្ស ការអនុវត្តតេស្តស្តង់ដាដូច PISA និង SEA-PLM និងការចូលរួមរបស់មាតាបិតា។

លោកឧបនាយករដ្ឋមន្ត្រីបានកោតសរសើរដល់បុគ្គលិកអប់រំគ្រប់លំដាប់ថ្នាក់ និងលើកទឹកចិត្តឱ្យប្រើប្រាស់បច្ចេកវិទ្យាថ្មីៗដូចជាបញ្ញាសិប្បនិម្មិត (AI) ដើម្បីបង្កើនប្រសិទ្ធភាពការងារ។

លោកក៏បានស្នើឱ្យលោកប្រធានមន្ទីរថ្មីរៀបចំ និងពិនិត្យមើលគ្រប់គ្រឹះស្ថានសិក្សា ព្រមទាំងអនុវត្តគោលនយោបាយចងសម្ព័ន្ធមេត្រីភាពរវាងមន្ទីរ និងសាលារៀននៅតំបន់ព្រំដែន។

ពិធីនេះបានបញ្ចប់ដោយជោគជ័យ ដោយមានការសន្យាពីថ្នាក់ដឹកនាំថ្មីក្នុងការពង្រឹងគុណភាពអប់រំនៅខេត្តក្រចេះ។

ដោយ៖ សិលា