By 
រាជធានីភ្នំពេញ – កម្ពុជាបានស្នើសុំឱ្យសហភាពអឺរ៉ុបបន្តគាំទ្រកិច្ចការបោសសម្អាតមីននៅតាមតំបន់ព្រំដែនកម្ពុជា-ថៃ ដែលមានយុទ្ធភណ្ឌគ្រឿងផ្ទុះបន្សល់ទុកពីសង្គ្រាមកម្ពុជា-ថៃកាលពីឆ្នាំ២០២៥។
នៅថ្ងៃទី២៥ ខែមីនា ឆ្នាំ២០២៦ ឯកឧត្តមបណ្ឌិតលី ធុជ ទេសរដ្ឋមន្ត្រី អនុប្រធានទី១អាជ្ញាធរមីន បានជួបពិភាក្សាជាមួយលោក Cosmin Dobran នាយកទទួលបន្ទុកសន្តិភាព ភាពជាដៃគូ និងគ្រប់គ្រងវិបត្តិនៃអង្គភាពសេវាកិច្ចការបរទេសរបស់សហភាពអឺរ៉ុប (EEAS)។
ឯកឧត្តមលី ធុជ បានសម្តែងការស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់គណៈប្រតិភូសហភាពអឺរ៉ុប និងថ្លែងអំណរគុណចំពោះការគាំទ្រយូរអង្វែងរបស់សហភាពអឺរ៉ុបក្នុងកិច្ចការបោសសម្អាតមីននៅកម្ពុជា។
កម្ពុជាបានលើកឡើងពីសមិទ្ធផលដ៏ធំធេងក្នុងកិច្ចការបោសសម្អាតមីន ដែលទទួលបានការវាយតម្លៃខ្ពស់ពីសហគមន៍អន្តរជាតិ និងត្រូវបានទទួលស្គាល់ជាប្រទេសឈានមុខគេក្នុងវិស័យនេះ។
ទោះជាយ៉ាងណា កម្ពុជានៅតែប្រឈមមុខនឹងបញ្ហាប្រឈមដ៏ស្មុគស្មាញនៅតាមតំបន់ព្រំដែនកម្ពុជា-ថៃ ដែលមានយុទ្ធភណ្ឌគ្រឿងផ្ទុះបន្សល់ទុកពីសង្គ្រាមកម្ពុជា-ថៃពីរលើកក្នុងឆ្នាំ២០២៥។
ឯកឧត្តមលី ធុជ បានស្នើសុំឱ្យសហភាពអឺរ៉ុបបន្តគាំទ្រចក្ខុវិស័យរបស់រាជរដ្ឋាភិបាលកម្ពុជា ដែលមានគោលដៅឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះសង្គ្រាម។
លោក Cosmin Dobran បានកោតសរសើរ និងវាយតម្លៃខ្ពស់ចំពោះផែនការសកម្មភាពសៀមរាប-អង្គរ ដែលកម្ពុជាធ្វើជាប្រធាន និងម្ចាស់ផ្ទះរៀបចំកិច្ចប្រជុំអនុសញ្ញាអូតាវ៉ាកាលពីឆ្នាំ២០២៤។
លោកបានបញ្ជាក់ថា សហភាពអឺរ៉ុបនឹងបន្តការប្តេជ្ញាចិត្តគាំទ្រដល់កិច្ចការបោសសម្អាតមីនមនុស្សធម៌នៅកម្ពុជា ដើម្បីពិភពលោកមួយគ្មានមីន។
