By ខេត្តស្វាយរៀង៖ កម្លាំងនគរបាលខេត្តស្វាយរៀង បានធ្វើប្រតិបត្តិការបង្ក្រាបករណីជួញដូរ រក្សាទុក និងកែឆ្នៃគ្រឿងញៀនទ្រង់ទ្រាយធំនៅក្រុងបាវិត ដោយដកហូតបានគ្រឿងញៀនជាង៤៤គីឡូក្រាម អាវុធខ្លី៤ដើម និងចាប់ខ្លួនជនសង្ស័យ៥នាក់។
ប្រតិបត្តិការនេះធ្វើឡើងកាលពីថ្ងៃទី១៨ ខែមីនា ឆ្នាំ២០២៦ ដោយកម្លាំងការិយាល័យប្រឆាំងគ្រឿងញៀនខេត្ត សហការជាមួយកម្លាំងអធិការដ្ឋាននគរបាលក្រុងបាវិត។ ប្រតិបត្តិការនេះមានការដឹកនាំពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្ត និងលោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន។
ជនសង្ស័យទាំង៥នាក់រួមមានជនជាតិវៀតណាម៤នាក់ និងជនជាតិចិនម្នាក់ ដែលមានអាយុពី២៥ទៅ២៨ឆ្នាំ។ ក្នុងចំណោមគ្រឿងញៀនដែលដកហូតបានមានថ្នាំញៀនប្រភេទកេតាមីន ទម្ងន់៨គីឡូ៦៤៣,៨៥ក្រាម ថ្នាំញៀនប្រភេទMDMA ទម្ងន់១៥គីឡូ៣៥៣,០៧ក្រាម ថ្នាំញៀនប្រភេទហេរ៉ូអុីន ទម្ងន់៤គីឡូ៣២៨,០៧ក្រាម និងជ័រអាអាភៀនទម្ងន់៨គីឡូ៨១១,៦៤ក្រាម។
លោកឧត្តមសេនីយ៍ត្រី កែវ សុថា បានប្រាប់ថា បច្ចុប្បន្នជនសង្ស័យ រួមទាំងវត្ថុតាងត្រូវបានសមត្ថកិច្ចជំនាញកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់។ ប្រតិបត្តិការនេះបង្ហាញពីការតស៊ូមតិរបស់អាជ្ញាធរក្នុងការប្រឆាំងនឹងគ្រឿងញៀននៅក្នុងខេត្ត។
