By ភ្នំពេញ៖ នៅក្នុងពេលដែលតម្លៃប្រេងឥន្ធនៈនៅលើទីផ្សារអន្តរជាតិកំពុងកើនឡើងខ្ពស់ រាជរដ្ឋាភិបាលកម្ពុជាបានចាត់វិធានការបន្តបញ្ចុះតម្លៃប្រេង ដើម្បីជួយសម្រាលការចំណាយរបស់ប្រជាពលរដ្ឋ។
លោក ប៉ែន បូណា អ្នកនាំពាក្យរាជរដ្ឋាភិបាល បានថ្លែងក្នុងសន្និសីទសារព័ត៌មាននៅថ្ងៃទី២៦ មីនា ២០២៦ ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានណែនាំឱ្យក្រសួង-ស្ថាប័នពាក់ព័ន្ធតាមដានស្ថានភាពប្រេងឥន្ធនៈយ៉ាងយកចិត្តទុកដាក់។
វិធានការសំខាន់ៗដែលរដ្ឋាភិបាលបានអនុវត្តមាន៖
១. បន្តបញ្ចុះតម្លៃប្រេង ៦.៥ សេនដុល្លាក្នុង១លីត្រ ដែលជាការជួយឧបត្ថម្ភផ្ទាល់ពីរដ្ឋាភិបាល
២. បន្តបញ្ចុះតម្លៃ១សេនដុល្លាបន្ថែមទៀត នៅពេលប្រេងសាំងអន្តរជាតិកើនលើសពី៩០ដុល្លាក្នុង១បារ៉ែល
៣. បញ្ចុះពន្ធគយដល់ ០ ពោលគឺរដ្ឋមិនយកពន្ធនាំចូលប្រេង
៤. បញ្ចុះអាករបន្ថែមលើប្រេងសាំងនិងប្រេងម៉ាស៊ូតដល់០ ដុល្លា
តាមសេចក្តីជូនដំណឹងរបស់ក្រសួងពាណិជ្ជកម្ម ចាប់ពីម៉ោង ០០:០០ ថ្ងៃទី២៦ មីនា ២០២៦ តម្លៃប្រេងសាំងធម្មតាត្រូវលក់ក្នុងតម្លៃ ៥,៤៥០រៀល/លីត្រ និងប្រេងម៉ាស៊ូត ៧,១០០រៀល/លីត្រ។
លោក ប៉ែន បូណា បានបញ្ជាក់ថា រាជរដ្ឋាភិបាលនឹងបន្តតាមដានស្ថានភាពទីផ្សារអន្តរជាតិ និងពិនិត្យលទ្ធភាពដាក់ចេញវិធានការអន្តរាគមន៍បន្ថែមទៀត ក្នុងករណីចាំបាច់។
វិធានការទាំងនេះជួយសម្រាលបន្ទុកដល់ប្រជាពលរដ្ឋ ជាពិសេសអ្នកប្រើប្រាស់យានយន្ត និងវិស័យដឹកជញ្ជូន នៅក្នុងពេលដែលតម្លៃប្រេងអន្តរជាតិកំពុងកើនឡើង។
ដោយ៖ តារា
