By យោងតាមប្រភពពីក្នុងជួររដ្ឋាភិបាលទីក្រុងវ៉ាស៊ីនតោន សហរដ្ឋអាមេរិកបានបញ្ជូនផែនការ១៥ចំណុចទៅអ៊ីរ៉ង់ ដើម្បីបញ្ចប់សង្គ្រាមមជ្ឈិមបូព៌ាដែលបានបន្តរយៈពេល៤សប្តាហ៍។
កាសែត New York Post បានដកស្រង់ប្រភពពីមន្ត្រីជាន់ខ្ពស់២រូបដែលសុំមិនបញ្ចេញឈ្មោះ ដែលបានទម្លាយថា ផែនការនេះត្រូវបានបញ្ជូនទៅតាមរយៈប្រទេសប៉ាគីស្ថាន ប៉ុន្តែភាគីអ៊ីរ៉ង់មិនទាន់និយាយអ្វីទេ។
ក្នុងចំណោម១៥ចំណុចសំខាន់ៗនោះ រួមមានការទាមទារឲ្យអ៊ីរ៉ង់រុះរើសមត្ថភាពនុយក្លេអ៊ែរទាំងអស់ បញ្ឈប់កម្មវិធីនុយក្លេអ៊ែរ និងអនុញ្ញាតឲ្យទីភ្នាក់ងារថាមពលអាតូមិកចូលពិនិត្យរាល់ព័ត៌មានទាំងអស់។
លោក ដូណាល់ ត្រាំ ប្រធានាធិបតីអាមេរិក បានបញ្ជាក់ថា អ៊ីរ៉ង់បានយល់ព្រមបោះបង់ចោលមហិច្ឆតាផលិតអាវុធនុយក្លេអ៊ែរហើយ។ ទោះជាយ៉ាងណា ផែនការ១៥ចំណុចនេះហាក់ដូចជាមានលក្ខខណ្ឌពិបាកសម្រាប់អ៊ីរ៉ង់ ហើយពិភពលោកកំពុងរង់ចាំមើលថាតើទីក្រុងតេហេរ៉ង់នឹងឆ្លើយតបបែបណា។
ការទាមទារផ្សេងៗទៀតរួមមានការបញ្ឈប់ការផ្តល់មូលនិធិដល់ក្រុមសកម្មប្រយុទ្ធក្នុងតំបន់ ការធានាឲ្យច្រកសមុទ្រ Hormuz បន្តបើកចំហ និងការកំណត់ចំនួនមីស៊ីលរបស់អ៊ីរ៉ង់។
