By ខេត្តស្វាយរៀង៖ សម្តេចធិបតី ហ៊ុន ម៉ាណែត បានបង្ហាញការរំពឹងទុកយ៉ាងខ្ពស់ថា ខេត្តស្វាយរៀងនឹងក្លាយជាតំបន់ដែលប្រមូលផ្តុំរោងចក្រឧស្សាហកម្មសំខាន់នាពេលខាងមុខ។ ការប្រកាសនេះត្រូវបានធ្វើឡើងក្នុងពិធីសម្ពោធដាក់ឱ្យប្រើប្រាស់រោងចក្រប្រព្រឹត្តកម្មទឹកស្អាតអណ្តូងតាសី នៅក្រុងស្វាយរៀង កាលពីព្រឹកថ្ងៃព្រហស្បតិ៍។
សម្តេចធិបតីបានពន្យល់ថា៖ “ហេដ្ឋារចនាសម្ព័ន្ធនានាដែលកំពុងត្រូវបានកសាង រួមមានផ្លូវល្បឿនលឿនជាច្រើន នឹងជួយធ្វើឱ្យខេត្តស្វាយរៀងក្លាយជាចំណុចតភ្ជាប់សំខាន់សម្រាប់ការអភិវឌ្ឍន៍ឧស្សាហកម្ម។”
សម្តេចបានបន្តថា សក្តានុពលរបស់ខេត្តស្វាយរៀងមិនមែនមានតែក្នុងវិស័យកសិកម្មទេ ប៉ុន្តែវិស័យឧស្សាហកម្មក៏ជាវិស័យដ៏មានសក្តានុពលដែរ។ សម្តេចមើលឃើញថា ក្នុងរយៈពេលប្រមាណ២០ឆ្នាំខាងមុខ ខេត្តនេះនឹងក្លាយជាខេត្តដ៏មានសក្តានុពលដែលនឹងជួយជំរុញសេដ្ឋកិច្ចជាតិ។
រោងចក្រប្រព្រឹត្តកម្មទឹកស្អាតអណ្តូងតាសី និងហេដ្ឋារចនាសម្ព័ន្ធថ្មីៗនៅខេត្តស្វាយរៀង នឹងអនុញ្ញាតឱ្យរដ្ឋាករទឹកស្វាយរៀងមានលទ្ធភាពផ្តល់សេវាទឹកស្អាតពេញលេញសម្រាប់ប្រជាពលរដ្ឋក្នុងក្រុងស្វាយរៀងទាំងមូល។ នេះនឹងពង្រីកអត្រាគ្របដណ្តប់ក្នុងតំបន់សេវា (ក្រុងស្វាយរៀង និងឃុំចំនួន៥នៃស្រុកស្វាយជ្រំ) ពី៣២% ទៅ៥៨%។
ដោយ៖ សិលា
