By ភ្នំពេញ៖ បុរសអាយុ២៩ឆ្នាំម្នាក់បានរងរបួសធ្ងន់ក្រោយពីជិះម៉ូតូលឿនជ្រុលបុកលូនៅតាមបណ្ដោយផ្លូវក្រវ៉ាត់ក្រុងទី៣ ក្នុងពេលព្រឹកឡើងយាន។
ហេតុការណ៍នេះបានកើតឡើងនៅម៉ោង៤:១៤នាទីព្រឹកថ្ងៃទី២៦ ខែមីនា ឆ្នាំ២០២៦ នៅតាមបណ្ដោយផ្លូវក្រវ៉ាត់ក្រុងទី៣ ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ។
ជនរងគ្រោះមានឈ្មោះ ងួន រ៉ុង ភេទប្រុស អាយុ២៩ឆ្នាំ ដែលមានអាសយដ្ឋាននៅភូមិក្រចាប់លើ ឃុំពាមមន្ចារ ស្រុកកំពង់ត្របែក ខេត្តព្រៃវែង។ គាត់បានរងរបួសរលាត់លើផ្ទៃមុខ និងរយះកែងជើងខាងស្ដាំ។
តាមប្រភពព័ត៌មានបានឱ្យដឹងថា មុនពេលកើតហេតុ គេបានឃើញបុរសម្នាក់ជិះម៉ូតូម៉ាក Beat មួយគ្រឿងធ្វើដំណើរតាមបណ្តោយផ្លូវក្រវ៉ាត់ក្រុងទី៣ ក្នុងល្បឿនលឿន សង្ស័យងងុយដេក ក៏រេចង្កូតទៅបុកលូនៅចិញ្ចើមផ្លូវ បណ្តាលឱ្យដួលបោកនិងថ្នល់ រងរបួសធ្ងន់។
ក្រោយកើតហេតុ ជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីពេទ្យព្រះកុសុមៈភ្លាមៗ។
អាជ្ញាធរមានសមត្ថកិច្ចបានផ្ដល់ការព្រមានដល់អ្នកបើកបរទាំងអស់ឱ្យប្រយ័ត្នប្រយែងក្នុងការបើកបរ ជាពិសេសនៅពេលព្រឹកឡើងយាន ដោយសារកត្តាងងុយដេកអាចបណ្តាលឱ្យកើតគ្រោះថ្នាក់ចរាចរណ៍។
ដោយ៖ សុខាសែនជ័យ
