កម្ពុជាបដិសេធយ៉ាងខ្លាំងក្នុងការលុប MOU ឆ្នាំ២០០០ របស់ថៃ ដោយចាត់ទុកថារំលោភច្បាប់អន្តរជាតិ

ភ្នំពេញ៖ រដ្ឋលេខាធិការដ្ឋានកិច្ចការព្រំដែនកម្ពុជាបានឆ្លើយតបយ៉ាងខ្លាំងក្លាចំពោះសំណើរបស់គណៈកម្មាធិការព្រឹទ្ធសភាថៃ ដែលស្នើឱ្យលុប MOU ឆ្នាំ២០០០ ដោយចាត់ទុកសំណើនេះថាគ្មានមូលដ្ឋានត្រឹមត្រូវ និងផ្ទុយពីច្បាប់អន្តរជាតិ។

លោក ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល បានបញ្ជាក់ក្នុងកិច្ចប្រជុំសារព័ត៌មានថ្ងៃទី២៦ មីនា ២០២៦ ថា MOU ឆ្នាំ២០០០ ជាកិច្ចព្រមព្រៀងទ្វេភាគីដ៏សំខាន់ ដែលបានចុះហត្ថលេខាដោយរាជរដ្ឋាភិបាលទាំងពីរ និងត្រូវបានចុះបញ្ជីនៅអង្គការសហប្រជាជាតិ។

អ្នកនាំពាក្យរដ្ឋលេខាធិការដ្ឋានកិច្ចការព្រំដែនបានលើកឡើងថា៖ “តាមគោលការណ៍ច្បាប់អន្តរជាតិ ភាគីថៃមិនអាចលើកយកហេតុផលផ្ទៃក្នុងណាមួយដើម្បីលុប MOU ឆ្នាំ២០០០ ដែលជាសន្ធិសញ្ញាពាក់ព័ន្ធនឹងព្រំដែនបានឡើយ។”

MOU នេះបានផ្តល់សមត្ថកិច្ចពេញលេញដល់គណៈកម្មការ JBC របស់ភាគីទាំងពីរ ក្នុងការដោះស្រាយបញ្ហាព្រំដែនដោយសន្តិវិធី។ នាពេលកន្លងមក គណៈកម្មការ JBC បានសម្រេចសមិទ្ធផលជាវិជ្ជមានជាច្រើន រួមមានការស្វែងរកទីតាំងបង្គោលព្រំដែនសម័យបារាំង ការជួសជុលបង្គោល និងការងារវាស់វែងលម្អិត។

ការលុប MOU នេះនឹងបង្កឧបសគ្គដល់ការដោះស្រាយបញ្ហាព្រំដែនដោយសន្តិវិធី និងរំលោភគោលការណ៍ខ្សែព្រំដែនមិនកែប្រែ (Uti Possidetis Juris)។

ក្រៅពីនេះ រាជរដ្ឋាភិបាលក៏បានប្រកាសវិធានការបញ្ចុះតម្លៃប្រេងឥន្ធនៈ ដើម្បីជួយសម្រាលការចំណាយរបស់ប្រជាពលរដ្ឋ រួមមានការបញ្ចុះតម្លៃ ៦.៥ សេនក្នុង១លីត្រ និងកាត់ពន្ធគយដល់ ០។

ផ្នែកមួយទៀត ក្រសួងការងារនឹងចាប់ផ្តើមការធ្វើតេស្តទទួលស្គាល់ជំនាញពីមុន (RPL) ចាប់ពីថ្ងៃទី២៤ មេសា ២០២៦ សម្រាប់អតីតពលករខ្មែរមកពីថៃ ក្នុងវិស័យសំណង់។

ដោយ៖ តារា