By ទីក្រុងប៉េកាំង៖ លោក Cai Qi សមាជិកគណៈកម្មាធិការអចិន្ត្រៃយ៍នៃមជ្ឈិមបក្សកុម្មុយនីស្តចិន បានចូលគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ កាលពីថ្ងៃទី២៥ មីនា នៅទីក្រុងប៉េកាំង។
យោងតាមប្រព័ន្ធផ្សព្វផ្សាយចិន ក្នុងជំនួបនេះ លោក Cai Qi បានសង្កត់ធ្ងន់ថា ទោះបីស្ថានភាពអន្តរជាតិមានការប្រែប្រួលក៏ដោយ ក៏មិត្តភាពរវាងចិន-កម្ពុជានៅតែរឹងមាំ និងរីកចម្រើនជាលំដាប់។ ភាគីចិនបានបញ្ជាក់ពីស្មារតីត្រៀមខ្លួនពេញលេញក្នុងការសហការជាមួយកម្ពុជា ដើម្បីអនុវត្តកិច្ចព្រមព្រៀងដែលមេដឹកនាំទាំងពីរបានឯកភាពគ្នា។
ព្រះករុណា ព្រះមហាក្សត្រ និងព្រះវររាជមាតាជាតិខ្មែរ បានមានព្រះរាជបន្ទូលឆ្លើយតបថា មិត្តភាពដែកថែបរវាងប្រទេសទាំងពីរ ដែលត្រូវបានកសាងឡើងដោយថ្នាក់ដឹកនាំជំនាន់មុន គឺនៅតែស្ថិតស្ថេរ និងមិនអាចរង្គោះរង្គើបាន។ ព្រះអង្គទាំងទ្វេបានបញ្ជាក់ពីការបន្តប្រកាន់ខ្ជាប់នូវគោលនយោបាយចិនតែមួយ និងការគាំទ្រគំនិតផ្ដួចផ្ដើមនានារបស់ភាគីចិន។
ដំណើរយាងទៅកាន់ទីក្រុងប៉េកាំងនាឱកាសនេះ គឺដើម្បីពិនិត្យព្រះរាជសុខភាពជាទៀងទាត់ ខណៈដែលក៏ជាឱកាសសំខាន់ក្នុងការជួបពិភាក្សាជាមួយថ្នាក់ដឹកនាំជាន់ខ្ពស់ចិន ដើម្បីបន្តរឹតចំណងមិត្តភាព និងកិច្ចសហប្រតិបត្តិការតំបន់វាសនារួមឱ្យកាន់តែរឹងមាំ។
កិច្ចប្រជុំនេះបានបង្ហាញពីការបន្តពង្រឹងទំនាក់ទំនងយុទ្ធសាស្ត្ររវាងប្រទេសទាំងពីរ និងការត្រៀមខ្លួនរួមគ្នាក្នុងការដោះស្រាយបញ្ហាអន្តរជាតិ និងជំរុញសន្តិភាពនៅក្នុងតំបន់ និងពិភពលោក។
