By រឿងឃាតកម្មដ៏សាហាវមួយបានកើតឡើងនៅរាជធានីភ្នំពេញ នៅពេលដែលជនដៃដល់ម្នាក់បានចាក់សម្លាប់ម្ចាស់ផ្ទះជួលដោយសារតែជម្លោះអំពីការហូបចុកឡូឡារំខានអ្នកជិតខាង។
ករណីចាក់សម្លាប់នេះបានកើតឡើងនៅវេលាម៉ោង០៧:៤៥នាទីយប់ ថ្ងៃទី២៦ ខែមីនា ឆ្នាំ២០២៦ នៅសង្កាត់ចាក់អង្រែលើ ខណ្ឌមានជ័យ។ ជនរងគ្រោះគឺជាម្ចាស់ផ្ទះជួលអាយុជាង៦០ឆ្នាំ ដែលត្រូវបានជនដៃដល់ចាក់សម្លាប់ដោយកាំបិតមុខស្រួច។
ប្រភពព័ត៌មានបានបញ្ជាក់ថា ហេតុការណ៍នេះបានកើតឡើងដោយសារតែម្ចាស់ផ្ទះបានណែនាំជនដៃដល់កុំឱ្យហូបចុក និងចាក់ធុងបាស់ឡូឡារំខានដល់អ្នកជិតខាងជាញឹកញាប់។ ការណែនាំនេះបានធ្វើឱ្យជនដៃដល់ខឹងចិត្ត និងចងគំនុំយ៉ាងខ្លាំង។
នៅថ្ងៃកើតហេតុ ជនដៃដល់បានឃើញឱកាសល្អ ក៏បានកាន់កាំបិតមុខស្រួចស្ទុះទៅចាក់សម្លាប់ម្ចាស់ផ្ទះនៅខាងក្នុងផ្ទះ បណ្តាលឱ្យស្លាប់ភ្លាមៗ។ ក្រោយពីប្រព្រឹត្តបទឧក្រិដ្ឋ ជនដៃដល់បានគេចខ្លួនបាត់ស្រមោល។
សមត្ថកិច្ចមូលដ្ឋានពីស្នងការដ្ឋាននគរបាលរាជធានីភ្នំពេញបានហ៊ុមព័ទ្ធទីតាំង និងត្រួតពិនិត្យសាកសពដើម្បីកំណត់មុខសញ្ញា និងស្វែងរកជនដៃដល់យកមកផ្តន្ទាទោសតាមផ្លូវច្បាប់។
អត្ថបទ៖ រដ្ឋា
