កាកបាទក្រហមស្ទឹងត្រែង ចុះផ្តល់ជំនួយមនុស្សធម៌ដល់ពលរដ្ឋមានជំងឺដុំពក និងដុះសាច់លើក្បាល

ខេត្តស្ទឹងត្រែង – កាលពីថ្ងៃទី២៦ មីនា ២០២៦ សាខាកាកបាទក្រហមកម្ពុជា ខេត្តស្ទឹងត្រែង បានរៀបចំសកម្មភាពមនុស្សធម៌ចុះសួរសុខទុក្ខ និងផ្តល់ជំនួយដល់ពលរដ្ឋដែលមានជំងឺធ្ងន់ធ្ងរចំនួន ២គ្រួសារ នៅភូមិច្រប់ ឃុំក្បាលរមាស ស្រុកសេសាន។

ក្រុមមន្ត្រីកាកបាទក្រហម ដឹកនាំដោយលោកនាយកសាខា បានអញ្ជើញចុះទៅកាន់លំនៅឋានពលរដ្ឋ ដោយនាំយកអំណោយមនុស្សធម៌ និងថវិកាលើកទឹកចិត្តជូនដល់ពលរដ្ឋដែលកំពុងជួបការលំបាក។

ពលរដ្ឋដែលទទួលបានការយកចិត្តទុកដាក់រួមមាន៖
១. លោកយាយ ជា សុភាព អាយុ ៦២ឆ្នាំ ដែលមានជំងឺដុះសាច់លើស្បែកក្បាល
២. លោក សេង ញ៉ាក់ អាយុ ៤៦ឆ្នាំ ដែលមានជំងឺដុះដុំពកតាមដៃជើង

សាខាកាកបាទក្រហមបានផ្តល់ជូនគ្រួសារនីមួយៗនូវគ្រឿងឧបភោគបរិភោគរួមមាន៖ អង្ករ ២០គីឡូក្រាម, មី ១កេស, ត្រីខ ១យួរ, ទឹកត្រី ១យួរ, ទឹកសុទ្ធ ១កេស, មុង ១, សារុង ១, ក្រមា ១ និងភួយ ១ រួមជាមួយថវិកាលើកទឹកចិត្តបន្ថែម។

លោកនាយកសាខាបានផ្តាំផ្ញើសារសួរសុខទុក្ខពីលោក សរ សុពុត្រា អភិបាលខេត្ត និងប្រធានគណៈកម្មាធិការសាខាកាកបាទក្រហម ដែលតែងយកចិត្តទុកដាក់ខ្ពស់ចំពោះសុខុមាលភាពប្រជាពលរដ្ឋ ជាពិសេសអ្នកដែលកំពុងជួបការលំបាក។

សកម្មភាពមនុស្សធម៌នេះបានឆ្លុះបញ្ចាំងពីស្មារតីកាកបាទក្រហមកម្ពុជា ដែលមានគ្រប់ទីកន្លែង សម្រាប់គ្រប់គ្នា ដោយមិនទុកនរណាម្នាក់ចោល។