ជនសង្ស័យចាក់សម្លាប់ម្ចាស់ផ្ទះជួល ដោយសារខឹងព្រោះត្រូវហាមឃាត់មិនឱ្យស្រែកឡូឡារំខានអ្នកជិតខាង

កម្លាំងសមត្ថកិច្ចនាយកដ្ឋានព្រហ្មទណ្ឌ បានសហការជាមួយនគរបាលខេត្តរតនគិរី ប្រើរយៈពេល២៨ម៉ោងតាមប្រមាញ់ជនសង្ស័យដែលបានចាក់សម្លាប់ម្ចាស់ផ្ទះជួលដោយសារខឹងចិត្ត។

ហេតុការណ៍ឃាតកម្មនេះបានកើតឡើងនៅវេលាម៉ោង ០៧:៤៥នាទីយប់ថ្ងៃទី២៦ ខែមីនា ឆ្នាំ២០២៦ នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ជនរងគ្រោះឈ្មោះ ងិន ធីរ៉ា អាយុជាង៦០ឆ្នាំ ដែលជាម្ចាស់ផ្ទះជួល ត្រូវបានជនសង្ស័យយកកាំបិតមុខស្រួចចាក់សម្លាប់យ៉ាងសាហាវ។

លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ព្រមទាំងកម្លាំងជំនាញបានចុះទៅទីតាំងកើតហេតុភ្លាមៗក្រោយទទួលបានព័ត៌មាន។ ការស៊ើបអង្កេតបានបង្ហាញថា មូលហេតុនៃឃាតកម្មនេះកើតឡើងដោយសារជនសង្ស័យខឹងចិត្តនឹងម្ចាស់ផ្ទះដែលបានហាមឃាត់មិនឱ្យខ្លួនស្រែកឡូឡារំខានដល់អ្នកជិតខាង។

នៅថ្ងៃទី២៧ ខែមីនា វេលាម៉ោង២៣:២០នាទី កម្លាំងសមត្ថកិច្ចបានឃាត់ខ្លួនជនសង្ស័យឈ្មោះ ហុក វិរៈ អាយុ៣៦ឆ្នាំ នៅភូមិអូរកន្សែង សង្កាត់បឹងកន្សែង ក្រុងបានលុង ខេត្តរតនគីរី។ ជនសង្ស័យបានសារភាពថា ខ្លួនពិតជាបានធ្វើឃាតកម្មនេះដោយសារតែខឹងជនរងគ្រោះដែលហាមឃាត់មិនឱ្យស្រែកឡូឡាពេក។

បច្ចុប្បន្ន ជនសង្ស័យកំពុងត្រូវបញ្ជូនខ្លួនមកកាន់នាយកដ្ឋាននគរបាលព្រហ្មទណ្ឌ ដើម្បីបន្តនីតិវិធីតាមច្បាប់។ ករណីនេះបង្ហាញពីការសហការដ៏មានប្រសិទ្ធភាពរវាងកម្លាំងសមត្ថកិច្ចកណ្តាល និងមូលដ្ឋានក្នុងការតាមចាប់ជនល្មើសច្បាប់។