ចិនព្រមានអាមេរិកយ៉ាងខ្លាំង កុំនាំសង្គ្រាមមកអាស៊ីប៉ាស៊ីហ្វិក

ថ្ងៃទី២៧មីនា – ប្រទេសចិនបានចេញសំឡេងព្រមានសហរដ្ឋអាមេរិកយ៉ាងខ្លាំងក្លា ដោយប្រឆាំងនឹងការនាំយក «ជម្លោះ និងភាពវឹកវរនៃសង្គ្រាម» មកកាន់តំបន់អាស៊ីប៉ាស៊ីហ្វិក។ ការព្រមាននេះមកបន្ទាប់ពីទីក្រុងវ៉ាស៊ីនតោន និងសម្ព័ន្ធមិត្តបានបង្ហាញពីគម្រោងសាងសង់មូលដ្ឋានអាវុធនៅលើទឹកដីហ្វីលីពីន។

យោងតាមការផ្សាយព័ត៌មានពី Straitstimes ក្រុមការពារជាតិអន្តររដ្ឋាភិបាលដែលដឹកនាំដោយសហរដ្ឋអាមេរិក បានយល់ព្រមកាលពីសប្តាហ៍មុន ដើម្បីវាយតម្លៃមូលនិធិសម្រាប់ការប្រមូលផ្គុំ និងខ្សែសង្វាក់ផលិតកម្មគ្រាប់រំសេវថ្មីនៅហ្វីលីពីន។

ការសម្រេចចិត្តនេះត្រូវបានធ្វើឡើងដោយសមាជិកចំនួន១៦ប្រទេសនៃភាពជាដៃគូសម្រាប់ភាពធន់នៃឧស្សាហកម្មឥណ្ឌូ-ប៉ាស៊ីហ្វិក (PIPIR) ដែលរួមមានចក្រភពអង់គ្លេស, អូស្ត្រាលី, ជប៉ុន, កូរ៉េខាងត្បូង និងហ្វីលីពីន។

អ្នកនាំពាក្យក្រសួងការបរទេសចិន លោក Lin Jian បានព្រមានយ៉ាងច្បាស់ថា៖ «សហរដ្ឋអាមេរិក និងសម្ព័ន្ធមិត្តគួរតែគោរពយ៉ាងស្មោះស្ម័គ្រចំពោះសេចក្តីប្រាថ្នារួមរបស់ប្រទេសក្នុងតំបន់ ហើយចៀសវាងការនាំយកការប្រឈមមុខដាក់គ្នារវាងប្លុក ជម្លោះ និងភាពវឹកវរនៃសង្គ្រាមចូលទៅក្នុងអាស៊ីប៉ាស៊ីហ្វិក»។

លោកបានបន្ថែមថា ប្រសិនបើប្រទេសពាក់ព័ន្ធមានឆន្ទៈក្នុងការធ្វើជាឃ្លាំងស្តុកម្សៅ និងគ្រាប់រំសេវ វានឹងបង្កផលវិបាកដល់ខ្លួនឯងទៅវិញ។ ទីក្រុងប៉េកាំងនឹង «ការពារអធិបតេយ្យភាពទឹកដី និងផលប្រយោជន៍សន្តិសុខរបស់ខ្លួនយ៉ាងម៉ឺងម៉ាត់បំផុត»។

ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំង និងទីក្រុងម៉ានីល បានប៉ះទង្គិចគ្នាជាញឹកញាប់លើទឹកដីដែលមានជម្លោះនៅសមុទ្រចិនខាងត្បូង។ ចិនទាមទារស្ទើរតែទាំងស្រុងនូវផ្លូវទឹកដ៏សំខាន់នេះ ទោះបីជាមានការសម្រេចពីអន្តរជាតិថា ការអះអាងរបស់ខ្លួនមិនមានមូលដ្ឋានច្បាប់ក៏ដោយ។