By ភ្នំពេញ៖ អគ្គនាយកស៊ីម៉ាក់ លោក ហេង រតនា បានចេញសារដាស់តឿនយ៉ាងខ្លាំងដល់ប្រជាពលរដ្ឋទូទាំងប្រទេស កុំឱ្យប៉ះពាល់គ្រាប់យុទ្ធភណ្ឌមិនទាន់ផ្ទុះ ឬយកមកចងព្យួរមុខផ្ទះ ដោយសារតែគ្រោះថ្នាក់អាចកើតឡើងគ្រប់ពេល។
ការព្រមាននេះបានចេញពីការកើនឡើងនៃករណីពលរដ្ឋយកគ្រាប់មិនទាន់ផ្ទុះទៅចងព្យួរមុខផ្ទះ ដោយគិតថាជាការលំអសម្រាប់តុបតែង។ លោក ហេង រតនា បានបង្ហោះរូបភាពចំនួន៤សន្លឹកនៅលើហ្វេសប៊ុក ដោយសរសេរថា៖ «សូមមេត្តាកុំយល់ច្រឡំថា គ្រាប់មិនទាន់ផ្ទុះចងព្យួរទាំងនេះសម្រាប់ដាក់លក់រាយស្អីនោះ ដឹងថាខុសច្បាប់ដែរ តែចងព្យួរទុកជូនពូមីងខាង CMAC!!»។
អគ្គនាយកស៊ីម៉ាក់បានបញ្ជាក់យ៉ាងច្បាស់ថា ការលើកដាក់ ដឹកជញ្ជូន ឬវាយដំគ្រាប់ទាំងនេះ អាចបណ្តាលឱ្យផ្ទុះភ្លាមៗ ដែលនឹងបាត់បង់ជីវិតខ្លួនឯង និងអ្នកដទៃ។ នេះជាទង្វើប្រកបដោយគ្រោះថ្នាក់ និងខុសឆ្គងទាំងស្រុង។
អង្គភាព CMAC បានអប់រំផ្សព្វផ្សាយ និងតែងតែអំពាវនាវថា៖ «ហាមប៉ះពាល់គ្រាប់យុទ្ធភណ្ឌមិនទាន់ផ្ទុះ ឃើញនៅកន្លែងណាដាក់សញ្ញាសម្គាល់ និងរាយការណ៍ជូនអាជ្ញាធរមូលដ្ឋាន ឬមន្ត្រីប៉ូលិស ឬមន្ត្រី CMAC ដែលនៅជិតបំផុត»។
ការព្រមាននេះបានចេញពីការកើនឡើងនៃគ្រោះថ្នាក់ដោយសារគ្រាប់មិនទាន់ផ្ទុះនៅតាមតំបន់ជនបទ ដែលពលរដ្ឋមួយចំនួនមិនទាន់យល់ពីគ្រោះថ្នាក់ពិតប្រាកដនៃវត្ថុផ្ទុះទាំងនេះ។
ស៊ីម៉ាក់បន្តអំពាវនាវឱ្យប្រជាពលរដ្ឋរក្សាសុវត្ថិភាព និងរាយការណ៍ភ្លាមៗទៅអាជ្ញាធរមានសមត្ថកិច្ច នៅពេលឃើញគ្រាប់យុទ្ធភណ្ឌមិនទាន់ផ្ទុះនៅតាមទីតាំងណាមួយ។
