By យោធាអ៊ីស្រាអែលបានបញ្ជាក់ថា បានប្រទះឃើញសញ្ញានៃការបាញ់មីស៊ីលមួយគ្រាប់ចេញពីប្រទេសយេមែន នៅថ្ងៃសៅរ៍ទី២៨ ខែមីនា ឆ្នាំ២០២៦ នេះ។ នេះជាលើកដំបូងក្រោយពីសង្គ្រាមមជ្ឈិមបូព៌ាបានផ្ទុះឡើងកាលពី១ខែមុន។
ការបាញ់មីស៊ីលនេះកើតឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីក្រុមឧទ្ទាមហ៊ូធី (Houthi) ដែលមានមូលដ្ឋាននៅយេមែន បានព្រមានកាលពីថ្ងៃសុក្រថា ពួកគេនឹងចូលរួមក្នុងសង្គ្រាមមជ្ឈិមបូព៌ា ប្រសិនបើការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់នៅតែបន្ត។
ក្រុមហ៊ូធីបានធ្វើសេចក្តីថ្លែងការណ៍យ៉ាងច្បាស់ថា៖ «យើងសូមបញ្ជាក់ថា ពួកយើងត្រៀមលក្ខណៈជានិច្ចដើម្បីចូលធ្វើអន្តរាគមន៍យោធាដោយផ្ទាល់»។
ការចូលរួមរបស់ក្រុមហ៊ូធីនឹងពង្រីកជម្លោះដែលកំពុងរាលដាលរួចស្រាប់នៅក្នុងតំបន់មជ្ឈិមបូព៌ា។ មកទល់ពេលនេះ ក្រុមសកម្មប្រយុទ្ធនៅលីបង់ និងអ៊ីរ៉ាក់ ដែលគាំទ្រដោយអ៊ីរ៉ង់ បានចូលរួមរួចជាស្រេចក្នុងសង្គ្រាមនេះ។
អ្វីដែលគួរឱ្យកត់សម្គាល់នោះ គឺក្រុមហ៊ូធីមានសមត្ថភាពវាយប្រហារបានឆ្ងាយ និងអាចបង្កការរំខានដល់ច្រកផ្លូវកប៉ាល់ដឹកជញ្ជូននៅជុំវិញឧបទ្វីបអារ៉ាប់ និងនៅសមុទ្រក្រហម។ ពួកគេធ្លាប់បានប្រើប្រាស់សមត្ថភាពនេះកន្លងមក ដើម្បីគាំទ្រក្រុមហាម៉ាស់នៅតំបន់ហ្កាហ្សា។
សង្គ្រាមនេះបានផ្ទុះឡើងក្រោយពីការវាយប្រហារតាមផ្លូវអាកាសរបស់សហរដ្ឋអាមេរិក និងអ៊ីស្រាអែលលើទីក្រុងតេហេរ៉ង់ កាលពី៤សប្តាហ៍មុន។
ការចូលរួមរបស់ក្រុមហ៊ូធីនឹងបង្កើនភាពស្មុគស្មាញដល់ស្ថានភាពសង្គ្រាម និងអាចធ្វើឱ្យជម្លោះរាលដាលទៅកាន់តំបន់ផ្សេងៗទៀតនៅក្នុងតំបន់មជ្ឈិមបូព៌ា។
ដោយ៖ ធីរីណា
