By ក្រុមឧទ្ទាមហ៊ូធីដែលមានមូលដ្ឋាននៅប្រទេសយេម៉ែន បានប្រកាសថាបានបាញ់មីស៊ីលវាយប្រហារលើគោលដៅយោធារបស់អ៊ីស្រាអែល នៅថ្ងៃសៅរ៍ទី២៨ ខែមីនា ឆ្នាំ២០២៦។ នេះជាការវាយប្រហារដំបូងរបស់ក្រុមហ៊ូធីចាប់តាំងពីសង្គ្រាមមជ្ឈិមបូព៌ាផ្ទុះឡើងកាលពីខែកុម្ភៈ។
លោក Yahya Saree អ្នកនាំពាក្យក្រុមហ៊ូធី បានថ្លែងតាមទូរទស្សន៍ថា៖ «ប្រតិបត្តិការរបស់យើងនឹងបន្តរហូតដល់សម្រេចបាននូវគោលដៅ ហើយអំពើឈ្លានពានត្រូវបានបញ្ឈប់នៅលើសមរភូមិតស៊ូទាំងអស់»។ ការវាយប្រហារនេះធ្វើឡើងក្នុងពេលដំណាលគ្នាជាមួយនឹងប្រតិបត្តិការរបស់កងកម្លាំងអ៊ីរ៉ង់និងក្រុមហេសបូឡានៅលីបង់។
កងទ័ពអ៊ីស្រាអែលបានបញ្ជាក់ថា នេះពិតជាមីស៊ីលដំបូងដែលបាញ់ចេញពីយេម៉ែនក្នុងសង្គ្រាមបច្ចុប្បន្ន ប៉ុន្តែប្រព័ន្ធការពារអាកាសបានស្ទាក់ចាប់ការគំរាមកំហែងនេះ។
ការចូលរួមដោយផ្ទាល់របស់ហ៊ូធីនឹងធ្វើឲ្យស្ថានការណ៍នៅសមុទ្រក្រហមកាន់តែតានតឹង ដែលអាចប៉ះពាល់ដល់ការដឹកជញ្ជូនទំនិញតាមកប៉ាល់អន្តរជាតិបន្ថែមទៀត។
អត្ថបទ៖ សុខ សុវណ្ណ
