ទូតជប៉ុនចុះពិនិត្យព្រំដែនខេត្តពោធិ៍សាត់ សន្យាបន្តគាំទ្រសន្តិភាព

ភ្នំពេញ៖ ស្ថានទូតជប៉ុនប្រចាំកម្ពុជាបានបញ្ជាក់ពីការចូលរួមរបស់ទីប្រឹក្សាអមស្ថានទូត លោក Matsuda Junsaku ក្នុងដំណើរចុះពិនិត្យទីតាំងជាក់ស្ដែងទាក់ទងនឹងស្ថានការណ៍ព្រំដែននៅខេត្តពោធិ៍សាត់។

នៅថ្ងៃទី២៧ ខែមីនា លោក Matsuda បានចូលរួមដំណើរទស្សនកិច្ចដែលរៀបចំដោយក្រសួងការបរទេស និងសហប្រតិបត្តិការអន្តរជាតិ ដើម្បីសិក្សាស្ថានការណ៍ព្រំដែនដោយផ្ទាល់។

រដ្ឋាភិបាលជប៉ុនបានសន្យាថានឹងបន្តខិតខំប្រឹងប្រែងតាមវិធានការផ្សេងៗ ដើម្បីជំរុញការអនុវត្តកិច្ចព្រមព្រៀងបទឈប់បាញ់ និងបន្ថយភាពតានតឹងតាមព្រំដែន។ ជប៉ុននឹងសហការជាមួយបណ្ដាប្រទេសពាក់ព័ន្ធ និងបន្តផ្ដល់ជំនួយក្នុងទម្រង់ផ្សេងៗ។

ការចុះពិនិត្យផ្ទាល់នេះបង្ហាញពីការយកចិត្តទុកដាក់របស់ជប៉ុនចំពោះសន្តិសុខ និងស្ថិរភាពនៅតំបន់ព្រំដែនកម្ពុជា។ ជប៉ុនបានអះអាងថានឹងបន្តធ្វើយ៉ាងពេញទំហឹងដើម្បីជំរុញការបន្ថយភាពតានតឹង និងធានាការអនុវត្តកិច្ចព្រមព្រៀងសន្តិភាព។

ដំណើរទស្សនកិច្ចនេះគឺជាផ្នែកមួយនៃកិច្ចខិតខំប្រឹងប្រែងរបស់សហគមន៍អន្តរជាតិក្នុងការថែរក្សាសន្តិភាពតាមព្រំដែនកម្ពុជា និងធានាសុវត្ថិភាពដល់ប្រជាពលរដ្ឋនៅតំបន់ជាប់ព្រំដែន។