By រាជធានីភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសថា នៅរាជធានីភ្នំពេញ ដែលជាមជ្ឈមណ្ឌលសេដ្ឋកិច្ចសំខាន់បំផុតនៃប្រទេស មានឱកាសការងារជាង ២២,០០០ កន្លែង សម្រាប់ផ្ដល់ជូនអតីតពលករដែលត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។
តាមការផ្សព្វផ្សាយពីក្រសួងការងារ គិតត្រឹមថ្ងៃទី២៨ ខែមីនា ឆ្នាំ២០២៦ រាជធានីភ្នំពេញមានឱកាសការងារសរុបចំនួន ២២,២១៩ កន្លែង ដែលកំពុងរង់ចាំអតីតពលករពីថៃ និងអ្នកស្វែងរកការងារនៅក្នុងវិស័យឧស្សាហកម្ម និងសេវាកម្ម។
ដើម្បីទទួលបានឱកាសការងារទាំងនេះ អតីតពលករពីថៃ និងអ្នកស្វែងរកការងារ អាចស្វែងរកព័ត៌មានលម្អិតអំពីលេខទំនាក់ទំនង ឈ្មោះរោងចក្រ និងវិស័យការងារតាមរយៈខិតបណ្ណការងាររបស់ក្រសួង។
ក្រៅពីការទាក់ទងផ្ទាល់ជាមួយរោងចក្រ សហគ្រាស និងអង្គការ អ្នកស្វែងរកការងារទាំងអស់ ជាពិសេសអតីតពលករ អាចទាក់ទងមកប្រព័ន្ធទំនាក់ទំនងបន្ទាន់លេខ ១២៩៧ ដើម្បីឱ្យក្រសួងការងារជួយសម្របសម្រួលការស្វែងរកការងារជូន។
ក្រសួងការងារបានរៀបចំបញ្ជីការងារយ៉ាងលម្អិត ដោយមានការងារច្រើនវិស័យ ចាប់ពីឧស្សាហកម្ម សេវាកម្ម ទៅដល់ការងារការិយាល័យ ដែលសមស្របសម្រាប់បុគ្គលិកលក្ខណៈផ្សេងៗគ្នា។
ជំហាននេះត្រូវបានគេមើលឃើញថាជាឱកាសល្អសម្រាប់អតីតពលករដែលត្រឡប់មកស្រុកកំណើត និងអ្នកដែលកំពុងស្វែងរកការងារនៅក្នុងប្រទេស ដើម្បីរកប្រាក់ចំណូល និងចូលរួមចំណែកក្នុងការអភិវឌ្ឍសេដ្ឋកិច្ចជាតិ។
