By ខេត្តក្រចេះ៖ ពិធីបើកជាផ្លូវការនៃព្រឹត្តិការណ៍បុណ្យទន្លេលើកទី១០ ឆ្នាំ២០២៦ បានប្រព្រឹត្តទៅយ៉ាងអធិកអធម នៅថ្ងៃទី២៨ ខែមីនា ក្រោមអធិបតីភាពរបស់លោកសន្តិបណ្ឌិត នេត សាវឿន ឧបនាយករដ្ឋមន្ត្រី និងតំណាងដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
ព្រឹត្តិការណ៍នេះរៀបចំដោយក្រសួងទេសចរណ៍ សហការជាមួយគណៈកម្មការអន្តរក្រសួង និងរដ្ឋបាលខេត្តក្រចេះ ដោយមានការចូលរួមពីអ្នកដឹកនាំជាន់ខ្ពស់ អ្នកឧកញ៉ា អ្នកអង្គទូត និងប្រជាពលរដ្ឋជាង ៣,៥០០ នាក់។
លោក វ៉ា ថន អភិបាលខេត្តក្រចេះ បានរាយការណ៍ពីស្ថានភាពអភិវឌ្ឍន៍របស់ខេត្ត និងសម្ដែងអំណរគុណចំពោះការដឹកនាំរបស់សម្តេចអគ្គមហាសេនាបតី តេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលបានជ្រើសរើសខេត្តក្រចេះជាម្ចាស់ផ្ទះព្រឹត្តិការណ៍នេះ។
លោករដ្ឋមន្ត្រីក្រសួងទេសចរណ៍ ហួត ហាក់ បានថ្លែងអំណរគុណយ៉ាងជ្រាលជ្រៅចំពោះការអនុញ្ញាតពីសម្តេចនាយករដ្ឋមន្ត្រី ដែលអនុញ្ញាតឱ្យប្រើប្រាស់ស្ពានមិត្តភាព កម្ពុជា-ចិន សម្រាប់ព្រឹត្តិការណ៍នេះ។
ព្រឹត្តិការណ៍បុណ្យទន្លេលើកទី១០ មានកម្មវិធីពិសេសជាច្រើន រួមមាន៖ ពិធីរាប់បាត្រព្រះសង្ឃ ៩៩ អង្គ កម្មវិធីដុតក្រឡាក្រចេះ ការលែងត្រីចូលទន្លេ ការដាំដើមឈើ និងសកម្មភាពកីឡាទេសចរណ៍ជាច្រើនទៀត។
លោកសន្តិបណ្ឌិត នេត សាវឿន បានសម្ដែងការកោតសរសើរចំពោះការសហការរបស់គ្រប់ស្ថាប័ន និងផ្តល់អនុសាសន៍សំខាន់ៗ ៨ ចំណុច សម្រាប់ការអភិវឌ្ឍ និងការអភិរក្សធនធានទន្លេ។
ក្នុងរយៈពេល ២ ថ្ងៃនៃព្រឹត្តិការណ៍ មានភ្ញៀវទេសចរ និងប្រជាពលរដ្ឋចូលរួមកម្សាន្តសរុបជាង ២២៤,៤៦៨ នាក់ ដោយក្នុងនោះមានភ្ញៀវទេសចរជាតិប្រមាណ ៥,០០០ នាក់ និងភ្ញៀវបរទេសជិត ៣០០ នាក់។
បុណ្យទន្លេដែលរៀបចំនៅខេត្តក្រចេះនេះ មានគោលបំណងលើកកម្ពស់ការយល់ដឹងអំពីសារៈសំខាន់នៃទន្លេ និងការអភិរក្សធនធានធម្មជាតិ ដើម្បីការអភិវឌ្ឍប្រកបដោយចីរភាព។
ព្រឹត្តិការណ៍នេះប្រព្រឹត្តទៅក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល» ដែលបង្ហាញពីតម្លៃដ៏សំខាន់នៃទន្លេក្នុងការអភិវឌ្ឍសង្គម-សេដ្ឋកិច្ចរបស់ប្រជាជនកម្ពុជា។
