By ខេត្តប៉ៃលិន៖ កម្លាំងកងរាជអាវុធហត្ថបានធ្វើប្រតិបត្តិការជោគជ័យកាលពីថ្ងៃទី២៨ មីនា ឆ្នាំ២០២៦ បន្ទាប់ពីទទួលបានព័ត៌មានតាមរយៈកម្មវិធីទូរស័ព្ទដៃ NoDrug អំពីការប្រើប្រាស់គ្រឿងញៀនខុសច្បាប់នៅស្រុកសាលាក្រៅ។
ព័ត៌មាននេះត្រូវបានរាយការណ៍តាម App NoDrug ពីភូមិផ្សារព្រំ ឃុំស្ទឹងកាច់ ដោយបានទំនាក់ទំនងភ្លាមទៅកាន់សមត្ថកិច្ចជំនាញ។ លោកឧត្តមសេនីយ៍ទោ ឃន តារាសម្បត្តិ អគ្គលេខាធិការរង និងជាប្រធានអនុគណៈកម្មការប្រចាំបញ្ជា២៤ម៉ោង បានបញ្ជាកម្លាំងអនុគណៈកម្មការសហការ និងផ្តល់ព័ត៌មានដល់កម្លាំងជំនាញ។
កម្លាំងសមត្ថកិច្ចដឹកនាំដោយលោកវរសេនីយ៍ឯក នង វណ្ណនី មេបញ្ជាការរងទទួលផែនការងារប្រឆាំងគ្រឿងញៀន បានចុះទៅទីតាំងដែលបានរាយការណ៍ និងធ្វើការឃាត់ខ្លួនជនសង្ស័យចំនួន ៣នាក់ (ស្រី ១នាក់)។
វត្ថុតាងដែលចាប់យកបានរួមមាន៖
– ម្សៅក្រាមពណ៌ស ៧កញ្ចប់ ទម្ងន់ ៦៧៤ក្រាម
– គ្រឿងញៀនប្រភេទមេតំហ្វេតាមីនទឹកកក (ICE) ៦កញ្ចប់
– ថ្នាំគ្រាប់សង្ស័យសារធាតុញៀន ៥៣គ្រាប់
– ជញ្ជីង ១គ្រឿង
– ទូរស័ព្ទ ២គ្រឿង
បច្ចុប្បន្ន ជនសង្ស័យទាំង៣នាក់ត្រូវបានឃាត់ខ្លួននៅបញ្ជាការដ្ឋានកងរាជអាវុធហត្ថខេត្តប៉ៃលិន ដើម្បីសាកសួរបន្ថែមតាមនិតិវិធី។
