By ភ្នំពេញ – អតីតនាយករដ្ឋមន្ត្រីនេប៉ាល់ លោក K.P. Sharma Oli ត្រូវបានប៉ូលីសចាប់ខ្លួនកាលពីថ្ងៃសៅរ៍កន្លងមក ដោយសារការស៊ើបអង្កេតពីបទធ្វេសប្រហែសក្នុងការទប់ស្កាត់ការស្លាប់រាប់សិបនាក់ក្នុងអំឡុងពេលតវ៉ាប្រឆាំងអំពើពុករលួយរបស់យុវជន Gen Z កាលពីខែកញ្ញាឆ្នាំមុន។
រដ្ឋមន្ត្រីក្រសួងមហាផ្ទៃរបស់លោក គឺលោក Ramesh Lekhak ក៏ត្រូវបានចាប់ខ្លួនផងដែរ។ ការចាប់ខ្លួននេះបានកើតឡើងមួយថ្ងៃបន្ទាប់ពីតារាចម្រៀងរ៉េប Balendra Shah ដែលប្រែក្លាយជាអ្នកនយោបាយ ត្រូវបានស្បថចូលកាន់តំណែងជានាយករដ្ឋមន្ត្រីនេប៉ាល់។
អ្នកនាំពាក្យប៉ូលីស លោក Om Adhikari បានបញ្ជាក់ថា ទាំងលោក Oli និងលោក Lekhak កំពុងត្រូវបានឃុំខ្លួននៅការិយាល័យប៉ូលីស Kathmandu ហើយនឹងត្រូវបញ្ជូនទៅតុលាការនៅថ្ងៃអាទិត្យ។ លោកបានមានប្រសាសន៍ថា៖ “យើងបានចាប់ខ្លួនពួកគេតាមអនុសាសន៍របស់គណៈកម្មការស៊ើបអង្កេត”។
គណៈកម្មការស៊ើបអង្កេតបានសម្រេចថា លោក Oli ត្រូវទទួលខុសត្រូវចំពោះការមិនបានចាត់វិធានការណាមួយដើម្បីបញ្ឈប់ការបាញ់ប្រហាររាប់ម៉ោង ដែលបានសម្លាប់អ្នកតវ៉ាជំនាន់ Z យ៉ាងហោចណាស់ ១៩ នាក់នៅថ្ងៃដំបូងនៃការធ្វើបាតុកម្ម។ សរុបមនុស្សចំនួន ៧៦ នាក់ត្រូវបានសម្លាប់ក្នុងរយៈពេលពីរថ្ងៃនៃភាពចលាចល ដែលនាំឱ្យលោក Oli លាលែងពីតំណែង។
មេធាវីរបស់លោក Oli គឺលោក Tikaram Bhattarai បានប្រាប់ Reuters ថា ការចាប់ខ្លួននេះមិនសមហេតុផលទេ។ លោកបាននិយាយថា៖ “ពួកគេបាននិយាយថា ការចាប់ខ្លួននេះគឺសម្រាប់ការស៊ើបអង្កេត។ វាខុសច្បាប់ និងមិនសមរម្យ ពីព្រោះមិនមានហានិភ័យនៃការរត់គេចខ្លួនរបស់គាត់ទេ”។
កំហឹងចំពោះការស្លាប់ទាំងនេះបានជួយឲ្យគណបក្ស Rastriya Swatantra របស់លោក Shah ទទួលបានជ័យជម្នះយ៉ាងភ្លូកទឹកភ្លូកដីក្នុងការបោះឆ្នោតក្នុងខែនេះ។ លោក Oli អាយុ ៧៤ ឆ្នាំ ដែលធ្លាប់បានប្តូរតម្រងនោមពីរដងរួចមកហើយ ត្រូវបានបញ្ជូនទៅមន្ទីរពេទ្យពីការិយាល័យប៉ូលីស យោងតាមសាក្សី។
ប្រភព៖ CNN
