ឧបនាយករដ្ឋមន្ត្រី ស សុខា សម្ពោធសួនសុវត្ថិភាពចរាចរណ៍ដំបូងក្នុងប្រទេស នៅខេត្តកំពង់ឆ្នាំង

ខេត្តកំពង់ឆ្នាំង៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតីក្នុងទិវាអន្តរជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោកលើកទី២០ និងពិធីសម្ពោធដាក់ឲ្យប្រើប្រាស់សួនសុវត្ថិភាពចរាចរណ៍ផ្លូវគោក។

ពិធីនេះបានប្រារព្ធធ្វើនៅក្នុងបរិវេណវិទ្យាល័យក្រុងកំពង់ឆ្នាំង ស្ថិតនៅភូមិទី៨ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ដោយមានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អ្នកតំណាងរាស្ត្រ ថ្នាក់ដឹកនាំក្រសួងស្ថាប័ន អភិបាលរាជធានី មន្ត្រីរាជការ មន្ទីរអង្គភាពជុំវិញខេត្ត គ្រូ-អ្នកគ្រូ សិស្សានុសិស្ស ប្រជាការពារ និងប្រជាពលរដ្ឋសរុបប្រមាណ ២ពាន់នាក់។

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឲ្យដឹងថា ទិវានេះត្រូវបានប្រារព្ធឡើងដើម្បីលើកកម្ពស់ការយល់ដឹងរបស់ប្រជាពលរដ្ឋអំពីហានិភ័យនៃគ្រោះថ្នាក់ចរាចរណ៍ ដែលបានបង្កបាត់បង់ជីវិតមនុស្ស កាយសម្បទា និងបង្កការខូចខាតទ្រព្យសម្បត្តិ។

សួនសុវត្ថិភាពចរាចរណ៍ផ្លូវគោកនេះត្រូវបានកសាងឡើងនៅក្នុងបរិវេណវិទ្យាល័យក្រុងកំពង់ឆ្នាំង ដែលជាសួនសិប្បនិម្មិតដំបូងបង្អស់ក្នុងប្រទេសកម្ពុជា ជាកន្លែងសម្រាប់ផ្ដល់ចំណេះដឹងទាំងទ្រឹស្ដីនិងការអនុវត្តជាក់ស្ដែងនៅទីវាល។

លោកអភិសន្តិបណ្ឌិត ស សុខា បានគូសបញ្ជាក់ថា ការសម្ពោធដាក់ឲ្យប្រើប្រាស់សួនសុវត្ថិភាពចរាចរណ៍ផ្លូវគោកនៅខេត្តកំពង់ឆ្នាំងនេះ គឺជាលើកទីមួយដែលពុំធ្លាប់មានខេត្តណាធ្វើបាននៅឡើយនោះទេ។

លោកបានអំពាវនាវដល់ប្រជាពលរដ្ឋ មន្ត្រីរាជការ សិស្សានុសិស្សដែលប្រើប្រាស់ផ្លូវ សូមចូលរួមគោរពច្បាប់ចរាចរណ៍ទាំងអស់គ្នា ដោយត្រូវគិតគូរសុវត្ថិភាពខ្លួនឯង ក្រុមគ្រួសារ និងអ្នកដទៃ។

លោកក៏បានស្នើឱ្យមាតាបិតា អាណាព្យាបាល ណែនាំដល់សមាជិករបស់ខ្លួនឲ្យមានការប្រុងប្រយ័ត្នក្នុងការបើកបរ កុំបើកបរលើសល្បឿនកំណត់ និងត្រូវពាក់មួកសុវត្ថិភាព។

សួនសុវត្ថិភាពចរាចរណ៍នេះនឹងជាកន្លែងសម្រាប់ផ្ដល់ចំណេះដឹងអំពីច្បាប់ចរាចរណ៍ ការគោរពសិទ្ធិអាទិភាព បច្ចេកទេស និងក្រមសីលធម៌នៃការបើកបរ ដល់សិស្សានុសិស្សនិងសាធារណៈជនទូទៅ។

គណៈអភិបាលរាជធានីខេត្តទូទាំងប្រទេសត្រូវបានអំពាវនាវឱ្យយកសួនសុវត្ថិភាពចរាចរណ៍ផ្លូវគោករបស់ខេត្តកំពង់ឆ្នាំងធ្វើជាគំរូ។