By កងម៉ារីន និងនាវិកអាមេរិកចំនួន ៣,៥០០នាក់ បានឈានជើងមកដល់តំបន់មជ្ឈិមបូព៌ានៅពេលដែលភាពតានតឹងរវាងសហរដ្ឋអាមេរិក និងអ៊ីរ៉ង់កំពុងកើនឡើង។ ការចូលមកដល់នេះកើតឡើងក្នុងពេលដែលមានព័ត៌មានថា វ៉ាស៊ីនតោនកំពុងរៀបចំផែនការថ្មើជើងនៅអ៊ីរ៉ង់។
បញ្ជាការកណ្តាលសហរដ្ឋអាមេរិក (CENTCOM) បានប្រកាសនៅថ្ងៃទី២៨ ខែមីនាថា នាវា USS Tripoli ដែលដឹកកងម៉ារីន និងនាវិកអាមេរិកចំនួន ៣,៥០០នាក់ បានមកដល់មជ្ឈិមបូព៌ា ខណៈដែលមន្ទីរបញ្ចកោណកំពុងពិចារណាលើជំហានបន្ទាប់របស់ខ្លួននៅក្នុងជម្លោះជាមួយអ៊ីរ៉ង់។
CENTCOM បាននិយាយថា “កងម៉ារីង អាមេរិកនៅលើនាវា USS Tripoli (LHA 7) បានមកដល់តំបន់ទទួលខុសត្រូវរបស់បញ្ជាការកណ្តាលសហរដ្ឋអាមេរិកនៅថ្ងៃទី២៧ ខែមីនា”។
យោងតាម CENTCOM ដែលជាកម្លាំងទទួលខុសត្រូវចំពោះប្រតិបត្តិការនៅមជ្ឈិមបូព៌ា “នាវាវាយប្រហារលើគោក និងលើទឹកថ្នាក់អាមេរិកនេះគឺជានាវាចម្បាំងនៃក្រុមត្រៀមប្រយុទ្ធលើគោក និងលើទឹក Tripoli/អង្គភាពបេសកកម្មម៉ារីនទី៣១ ដែលមានម៉ារីន និងនាវិកប្រហែល ៣,៥០០នាក់ រួមជាមួយនឹងយន្តហោះដឹកជញ្ជូន និងយន្តហោះចម្បាំង ក៏ដូចជាយានជំនិះវាយប្រហារលើគោក និងលើទឹកយុទ្ធសាស្ត្រ”។
កាសែត Wall Street Journal បានរាយការណ៍ថា កងកម្លាំងម៉ារីននេះត្រូវបានបណ្តុះបណ្តាលយ៉ាងល្អដើម្បីដាក់ពង្រាយក្នុងសេណារីយ៉ូប្រយុទ្ធជាច្រើនប្រភេទ រួមទាំងការវាយប្រហារលើឆ្នេរខ្សាច់ ការទម្លាក់ឆ័ត្រយោងទៅកាន់កោះ និងការវាយឆ្មក់លើនាវាសម្រាប់ប្រតិបត្តិការចាប់យក។
កាសែត New York Times បានកត់សម្គាល់ថា កងម៉ារីន និងនាវិកអាមេរិកដែលត្រូវបានដាក់ពង្រាយអាចចូលរួមក្នុងកិច្ចខិតខំប្រឹងប្រែងដើម្បីបើកច្រកសមុទ្រ Hormuz ឡើងវិញ ដែលអ៊ីរ៉ង់បានបិទភាគច្រើននៅពេលដែលជម្លោះជាមួយសហរដ្ឋអាមេរិក និងអ៊ីស្រាអែលបានផ្ទុះឡើង។
ទោះបីជាវានៅតែមិនច្បាស់ថាប្រតិបត្តិការអ្វីដែលកម្លាំងនេះនឹងដាក់ពង្រាយនៅក្នុងតំបន់ក៏ដោយ ប្រភពព័ត៌មានបានបង្ហាញថា ពួកគេអាចត្រូវបានប្រគល់ភារកិច្ចឱ្យវាយឆ្មក់កោះផ្សេងៗនៅក្នុងច្រកសមុទ្រ Hormuz។
