By ខេត្តសៀមរាប៖ សមត្ថកិច្ចបានបញ្ជាក់ពីករណីបុរសម្នាក់ដែលលង់ទឹកស្លាប់នៅស្រះមួយក្នុងស្រុកអង្គរជុំ ក្រោយពីបាត់ខ្លួនជាង១ថ្ងៃ។
ប្រភពព័ត៌មានបានឱ្យដឹងថា នៅវេលាម៉ោង៧យប់ថ្ងៃទី២៤ ខែមីនា ឆ្នាំ២០២៦ នៅទឹកស្រះខ្ចារ ដែលមានបណ្តោយ៨០ម៉ែត្រ ទទឹង៣០ម៉ែត្រ និងជំរៅ៩ម៉ែត្រ ក្បែរវត្តខ្ចារ ភូមិខ្ចារ ឃុំគោកដូង ស្រុកអង្គរជុំ មានការប្រទះឃើញសពបុរសម្នាក់អណ្តែតក្នុងទឹក។
ជនរងគ្រោះឈ្មោះ មឿយ ទូន អាយុ៤៣ឆ្នាំ ជាអ្នកភូមិខ្ចារ។ តាមការបំភ្លឺរបស់ប្រពន្ធគាត់ ឈ្មោះ ឃិន ពេជ្រ អាយុ៤៤ឆ្នាំ ប្តីនាងបានបាត់ខ្លួនតាំងពីថ្ងៃទី២៣ មីនា វេលាម៉ោង៩:៣០យប់ ដោយមិនដឹងថាទៅទីណា។
កូនប្រុសរបស់គាត់ ឈ្មោះ ទូន ថៃ អាយុ២៣ឆ្នាំ បានឃើញកន្សែងពោះគោពណ៌ក្រហមរបស់ឪពុកនៅក្បែរមាត់ស្រះ បន្ទាប់មកកម្លាំងសមត្ថកិច្ច ប្រជាការពារ និងអ្នកភូមិបានជួយស្រាវជ្រាវរក។
សមត្ថកិច្ចបានឱ្យដឹងថា ជនរងគ្រោះជាមនុស្សមានជំងឺសសៃប្រសាទ (សតិមិនល្អ) លេបថ្នាំជាប្រចាំរយៈ៤ឆ្នាំមកហើយ។ ពេលស្រវឹងស្រា គាត់តែងតែឃើញខ្មោច និងរត់ចេញពីផ្ទះជាញឹកញាប់។
ការពិនិត្យសាកសពដោយអ្នកជំនាញបានរកឃើញថា គ្មានស្លាកស្នាមអ្វីពាក់ព័ន្ធនឹងបទល្មើសព្រហ្មទណ្ឌទេ។ កម្លាំងជំនាញនិងគ្រូពេទ្យមណ្ឌលសុខភាពឃុំគោកដូងបានសន្និដ្ឋានថា ជនរងគ្រោះស្លាប់ដោយលង់ទឹក។ សពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។
