ក្រសួងមហាផ្ទៃប្រឡងជ្រើសរើសមន្ត្រីពន្ធនាគារ ៥៣ រូប ក្នុងចំណោមបេក្ខជន ២៣៩ រូប

រាជធានីភ្នំពេញ – ក្រសួងមហាផ្ទៃបានធ្វើការប្រឡងជ្រើសរើសក្របខ័ណ្ឌមន្ត្រីពន្ធនាគារសម្រាប់ឆ្នាំ២០២៦ នៅព្រឹកថ្ងៃអាទិត្យ ទី២៩ មីនា ដោយមានបេក្ខជនចំនួន ២៣៩ រូប ដែលត្រូវជ្រើសរើសយកត្រឹមតែ ៥៣ រូបប៉ុណ្ណោះ។

ការប្រឡងនេះបានធ្វើឡើងនៅមណ្ឌលប្រឡងវិទ្យាល័យជា ស៊ីម សន្ធរម៉ុក ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។ ការប្រឡងធ្វើឡើងក្រោមការអញ្ជើញកាត់វិញ្ញាសារប្រឡងដោយឯកឧត្តមសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ និងលោក ឆាយ វីរៈ អភិបាលរងរាជធានីភ្នំពេញ។

ក្នុងចំណោមបេក្ខជនសរុប ២៣៩ រូប មាននារីចំនួន ៩៩ រូប ដែលត្រូវបែងចែកជា ១១ បន្ទប់ប្រឡង។ ការប្រឡងមានរយៈពេល ២ ម៉ោង ចាប់ពីម៉ោង ០៨:០០ ដល់ ១០:០០ ព្រឹក ដោយមានវិញ្ញាសាចំណេះដឹងទូទៅ និងចំណេះដឹងវិស័យពន្ធនាគារ។

មន្ត្រីរដ្ឋបាលរាជធានីភ្នំពេញបានឱ្យដឹងថា បេក្ខជនត្រូវបានចែកចាយតាមតំបន់ផ្សេងៗដូចជា៖

• ពន្ធនាគាររាជធានីភ្នំពេញ៖ បេក្ខជន ៩២ រូប (នារី ២០ រូប) ក្នុង ០៤ បន្ទប់
• មណ្ឌលអប់រំកែប្រែទី១៖ បេក្ខជន ៦៥ រូប (នារី ០០ រូប) ក្នុង ០៣ បន្ទប់
• មណ្ឌលអប់រំកែប្រែទី២៖ បេក្ខជន ៨២ រូប (នារី ៧៩ រូប) ក្នុង ០៤ បន្ទប់

ក្នុងការប្រឡងនេះ បេក្ខជនត្រូវបានហាមឃាត់មិនឱ្យលួចចម្លង ពិភាក្សាគ្នា ឬយកទូរស័ព្ទ និងឧបករណ៍អេឡិចត្រូនិកផ្សេងៗចូលក្នុងបន្ទប់ប្រឡង។ ការល្មើសបទប្បញ្ញត្តិនឹងនាំឱ្យបេក្ខជនត្រូវបណ្តេញចេញ និងទទួលពិន្ទុសូន្យ។

ការប្រឡងនេះគឺជាផ្នែកមួយនៃយុទ្ធសាស្ត្រកែលម្អប្រព័ន្ធពន្ធនាគារនៅកម្ពុជា ដោយជ្រើសរើសមន្ត្រីដែលមានសមត្ថភាព និងគុណវុឌ្ឍិខ្ពស់ដើម្បីធានាសុវត្ថិភាព និងសន្តិសុខសង្គម។

លទ្ធផលនៃការប្រឡងនឹងត្រូវប្រកាសនៅពេលក្រោយ ដោយបេក្ខជនដែលជាប់ចំណាត់ថ្នាក់ខ្ពស់ជាងគេនឹងត្រូវជ្រើសរើសចូលបម្រើការងារក្នុងក្របខ័ណ្ឌមន្ត្រីពន្ធនាគារក្រសួងមហាផ្ទៃ។