វិបត្តិមនុស្សធម៌ធ្ងន់ធ្ងរនៅលីបង់៖ អ្នកស្លាប់លើស ១,២០០នាក់ ខណៈអ៊ីស្រាអែលបន្តវាយប្រហារតាមអាកាស

ស្ថានភាពនៅប្រទេសលីបង់កំពុងធ្លាក់ក្នុងភាពអាសន្នយ៉ាងខ្លាំង បន្ទាប់ពីចំនួនអ្នកបាត់បង់ជីវិតបានកើនឡើងដល់ ១,២៣៨នាក់ និងអ្នករបួសជាង ៣,៥០០នាក់ ចាប់តាំងពីជម្លោះបានផ្ទុះឡើងកាលពីដើមខែមីនាកន្លងទៅ។

យោងតាម The Star គ្រាន់តែក្នុងថ្ងៃអាទិត្យទី២៩មីនា មនុស្ស ៤៩នាក់បន្ថែមទៀតបានបាត់បង់ជីវិត និង ១១៦នាក់បានរងរបួស ដោយសារគ្រាប់បែកដែលទម្លាក់ពីយន្តហោះចម្បាំងអ៊ីស្រាអែលនៅភាគខាងត្បូងប្រទេស។

បច្ចុប្បន្ន កងទ័ពអ៊ីស្រាអែលបានចេញបញ្ជាឲ្យប្រជាជននៅតំបន់ Dahieh ក្បែរទីក្រុងបេរូត រត់ភៀសខ្លួនជាបន្ទាន់ មុននឹងការវាយប្រហារថ្មីចាប់ផ្តើម។

ក្រៅពីការបាត់បង់ជីវិត វិបត្តិមនុស្សធម៌ក៏កំពុងក្លាយជាបន្ទុកដ៏ធ្ងន់ធ្ងរផងដែរ។ មនុស្សជាង ១៣៦,០០០នាក់ ឬស្មើនឹងប្រមាណ ៣៥,១៧០គ្រួសារ កំពុងជ្រកកោនក្នុងមជ្ឈមណ្ឌលសង្គ្រោះចំនួន ៦៦៣កន្លែង ដែលរដ្ឋាភិបាលរៀបចំឡើង។

រលកនៃសង្គ្រាមនេះបានចាប់ផ្ដើមឆាបឆេះឡើងវិញកាលពីថ្ងៃទី២មីនា បន្ទាប់ពីក្រុមហេសបូឡាបានបាញ់រ៉ុក្កែតទៅលើអ៊ីស្រាអែលជាលើកដំបូង ចាប់តាំងពីមានបទឈប់បាញ់កាលពីចុងឆ្នាំ២០២៤។