By សាកលវិទ្យាល័យអាមេរិកនៅមជ្ឈិមបូព៌ាបានប្រកាសប្ដូរទៅការបង្រៀនតាមអ៊ីនធឺណិតទាំងស្រុង បន្ទាប់ពីកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ចេញឱសានវាទគំរាមសងសឹក។
ការសម្រេចចិត្តនេះមកបន្ទាប់ពី IRGC ចោទប្រកាន់យោធាអាមេរិក និងអ៊ីស្រាអែលថាបានទម្លាក់គ្រាប់បែកលើសាកលវិទ្យាល័យវិទ្យាសាស្ត្រ និងបច្ចេកវិទ្យានៅទីក្រុងតេអេរ៉ង់ កាលពីថ្ងៃទី២៩ មីនា ដោយបំផ្លាញអគារបរិវេណសាលា។
IRGC បានដាក់ឱសានវាទទាមទារឱ្យសហរដ្ឋអាមេរិក “ថ្កោលទោសការវាយប្រហារ” លើសាកលវិទ្យាល័យអ៊ីរ៉ង់ត្រឹមម៉ោង ១២:០០ រសៀលថ្ងៃទី៣០ មីនា (ម៉ោង ៣:៣០ រសៀលនៅទីក្រុងភ្នំពេញ) ឬសងសឹកប្រឆាំងនឹងសាកលវិទ្យាល័យអាមេរិកនៅមជ្ឈិមបូព៌ា។
អគ្គនាយកសាកលវិទ្យាល័យអាមេរិកនៅទីក្រុងបេរូតបានប្រកាសថា សាលានឹងប្ដូរទៅបង្រៀនតាមអ៊ីនធឺណិតទាំងស្រុងនៅថ្ងៃទី៣០ និង៣១ មីនា “ជាការប្រុងប្រយ័ត្ន” ប្រឆាំងនឹងការគំរាមកំហែងពី IRGC។ សាកលវិទ្យាល័យអាមេរិកនៃប្រទេសលីបង់ក៏បានប្រកាសអនុវត្តវិធានការស្រដៀងគ្នានេះដែរ។
សហរដ្ឋអាមេរិកមិនទាន់ឆ្លើយតបទៅនឹងឱសានវាទរបស់ IRGC នៅឡើយទេ។ កងកម្លាំង IRGC បានណែនាំដល់សាស្ត្រាចារ្យ បុគ្គលិក និងនិស្សិតនៃសាកលវិទ្យាល័យអាមេរិកនៅមជ្ឈិមបូព៌ា ក៏ដូចជាអ្នកស្រុកនៅក្នុងតំបន់ជុំវិញ “ឱ្យនៅចម្ងាយមួយគីឡូម៉ែត្រពីបរិវេណសាលា”។
សាកលវិទ្យាល័យជាច្រើននៅក្នុងតំបន់បានប្ដូរទៅរៀនតាមអ៊ីនធឺណិតភ្លាមៗនៅពេលដែលសហរដ្ឋអាមេរិក និងអ៊ីស្រាអែលបានបើកការវាយប្រហារទៅលើប្រទេសអ៊ីរ៉ង់នៅថ្ងៃទី២៨ កុម្ភៈកន្លងទៅ។ ការប្ដូរទៅការបង្រៀនតាមអ៊ីនធឺណិតនេះត្រូវបានចាត់ទុកជាវិធានការប្រុងប្រយ័ត្នដើម្បីការពារសុវត្ថិភាពគ្រប់គ្នា។
