ត្រុមប៉ះប៉ូរ ប្រកាសចង់យកប្រេងអ៊ីរ៉ង់ ត្រៀមគ្រប់គ្រងកោះខារ ខណៈអាមេរិកដាក់ទ័ពរាប់ពាន់នាក់ទៅមជ្ឈិមបូព៌ា

ភ្នំពេញ៖ ប្រធានាធិបតី Donald Trump បានប្រកាសជាសាធារណៈថា លោកមានបំណងចង់យកប្រេងពីអ៊ីរ៉ង់ និងត្រៀមខ្លួនគ្រប់គ្រងកោះ Kharg ដែលជាច្រកនាំចេញប្រេងសំខាន់របស់ប្រទេសនេះ។ ការប្រកាសនេះកើតឡើងក្នុងពេលសហរដ្ឋអាមេរិកកំពុងដាក់ពង្រាយកងទ័ពរាប់ពាន់នាក់ទៅកាន់តំបន់មជ្ឈិមបូព៌ា។

នៅក្នុងបទសម្ភាសន៍ជាមួយក្រុមហ៊ុន Financial Times នៅថ្ងៃទី២៩ ខែមីនា លោក Trump បានបញ្ជាក់យ៉ាងច្បាស់ថា៖ “អាទិភាពរបស់ខ្ញុំគឺយកប្រេងពីអ៊ីរ៉ង់”។ លោកបានប្រៀបធៀបយុទ្ធសាស្ត្រនេះទៅនឹងស្ថានភាពនៅវេណេស៊ុយអេឡា ដែលសហរដ្ឋអាមេរិកមានបំណងគ្រប់គ្រងឧស្សាហកម្មប្រេងរបស់ប្រទេសនោះបន្ទាប់ពីចាប់ខ្លួនប្រធានាធិបតី Nicolas Maduro កាលពីខែមករា។

“និយាយឱ្យត្រង់ទៅ អ្វីដែលខ្ញុំចង់បានបំផុតគឺយកប្រេងពីអ៊ីរ៉ង់ ប៉ុន្តែមនុស្សល្ងង់មួយចំនួននៅអាមេរិកកំពុងសួរថា ‘ហេតុអ្វីបានជាអ្នកធ្វើបែបនោះ?'” នេះជាប្រកាសដ៏ច្បាស់លាស់របស់លោក Trump។

ការអត្ថាធិប្បាយរបស់ប្រធានាធិបតី Trump កើតឡើងក្នុងពេលដែលមានភាពតានតឹងខ្ពស់រវាងសហរដ្ឋអាមេរិក អ៊ីស្រាអែល និងអ៊ីរ៉ង់ ដែលបានធ្វើឱ្យតំបន់មជ្ឈិមបូព៌ាស្ថិតក្នុងវិបត្តិ និងបណ្តាលឱ្យតម្លៃប្រេងពិភពលោកឡើងថ្លៃយ៉ាងខ្លាំង។

យុទ្ធសាស្ត្ររបស់លោក Trump ក្នុងការយកប្រេងពីអ៊ីរ៉ង់មានន័យថា សហរដ្ឋអាមេរិកត្រូវតែគ្រប់គ្រងកោះ Kharg ដែលជាកោះយុទ្ធសាស្ត្រមួយដែលប្រេងភាគច្រើនរបស់អ៊ីរ៉ង់ត្រូវបាននាំចេញទៅក្រៅប្រទេស។

សហរដ្ឋអាមេរិកកំពុងពង្រឹងកម្លាំងយោធារបស់ខ្លួននៅតំបន់មជ្ឈិមបូព៌ា ដោយមន្ទីរបញ្ចកោណបានបញ្ជាឱ្យដាក់ពង្រាយកងទ័ពដែលបានហ្វឹកហាត់ចំនួន ១០,០០០ នាក់ទៅកាន់តំបន់នោះ។ ប្រភពយោធាខ្លះបង្ហាញថា សហរដ្ឋអាមេរិកមានគម្រោងដាក់កងទ័ពដើម្បីគ្រប់គ្រងកោះខារ និងតំបន់ឆ្នេរសមុទ្រផ្សេងទៀតរបស់អ៊ីរ៉ង់។

ទាហានអាមេរិកប្រហែល ៣,៥០០ នាក់បានមកដល់មជ្ឈិមបូព៌ានៅថ្ងៃទី២៧ ខែមីនា រួមទាំងទាហានម៉ារីនប្រហែល ២,២០០ នាក់។ ទាហានម៉ារីន ២,២០០ នាក់ទៀតកំពុងធ្វើដំណើរ ខណៈដែលទាហានរាប់ពាន់នាក់មកពីកងពលទ័ពអាកាសទី៨២ ត្រូវបានបញ្ជាឱ្យទៅកាន់តំបន់នោះដែរ។