By បាត់ដំបង៖ សមត្ថកិច្ចបានកំណត់អត្តសញ្ញាណជនបើកបររថយន្ត Mercedes Benz AMG GT53 ដែលបានបុកម៉ូតូពីរគ្រឿង បណ្តាលឱ្យមនុស្ស៦នាក់ស្លាប់ និង១នាក់របួសធ្ងន់នៅស្រុកមោងឫស្សី ខេត្តបាត់ដំបង។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងនៅថ្ងៃទី២៧ ខែមីនា ឆ្នាំ២០២៦ វេលាម៉ោង២២:៤០នាទី លើផ្លូវជាតិលេខ៥ ចន្លោះបង្គោលគីឡូម៉ែត្រលេខ២៤៦-២៤៧ នៅភូមិកកោះ ស្រុកមោងឫស្សី។
យោងតាមការបញ្ជាក់របស់លោក ចាន់ សុធី នាយការិយាល័យចរាចរណ៍ផ្លូវគោកខេត្តបាត់ដំបង ជនបង្កគឺ ស៊ីវ ជ័យសិដ្ឋ អាយុ២០ឆ្នាំ មានស្រុកកំណើតនៅឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ។
រថយន្ត Mercedes ពណ៌ខ្មៅ លេខផ្ទាំង C.S.6168 បានបើកបរក្នុងល្បឿនលឿនពីទិសភ្នំពេញឆ្ពោះទៅបាត់ដំបង ហើយបានបុកពីក្រោយម៉ូតូពីរគ្រឿងដែលកំពុងបើកបរស្របទិសគ្នា។
ជនរងគ្រោះដែលស្លាប់ទាំង៦នាក់មានទាំងកុមារ និងស្ត្រីមានផ្ទៃពោះ រួមមាន៖ ប៉ុក ស៊ីណាប់ (៣២ឆ្នាំ), ម៉េន ម៉ីនាង (១០ឆ្នាំ), សួន ធានី (៥០ឆ្នាំ), វុន ស្រីជា (៤៣ឆ្នាំ), និង ចាន់ ចាវ (៧ឆ្នាំ)។ ចំណែក ម៉េន សុខមាន (៧ឆ្នាំ) របួសធ្ងន់ត្រូវបានដឹកទៅសង្គ្រោះ។
បច្ចុប្បន្ន រថយន្តបង្កត្រូវបានយកទៅរក្សាទុកនៅការិយាល័យចរាចរណ៍ផ្លូវគោក ខណៈសមត្ថកិច្ចកំពុងតាមស្រាវជ្រាវដើម្បីចាប់ខ្លួនជនបង្កដែលបានគេចខ្លួន។
សពជនរងគ្រោះត្រូវបានប្រគល់ទៅគ្រួសារសាច់ញាតិដើម្បីធ្វើបុណ្យតាមប្រពៃណី។ ការស៊ើបអង្កេតនៅតែបន្តដើម្បីរកយុត្តិធម៌ឱ្យជនរងគ្រោះ។
