អាវុធហត្ថភ្នំពេញចាប់បានជនប្រព្រឹត្តបោកប្រាស់ដោយប្រើឈ្មោះអាវុធហត្ថ កំហែងយកប្រាក់ពីអ្នកលក់បារីអេឡិចត្រូនិក

អាវុធហត្ថរាជធានីភ្នំពេញ បានចុះបង្ក្រាបទីតាំងលក់បារីអេឡិចត្រូនិកមួយកន្លែង ហើយជួបរឿងគួរឲ្យភ្ញាក់ផ្អើល នៅពេលដែលមានជនសង្ស័យប្រព្រឹត្តបោកប្រាស់ដោយប្រើឈ្មោះអាវុធហត្ថ។

កាលពីថ្ងៃទី១៨ ខែមករា ឆ្នាំ២០២៦ អាវុធហត្ថរាជធានីភ្នំពេញ បានបង្ក្រាបទីតាំងលក់ឧបករណ៍អេឡិចត្រូនិកសម្រាប់ជក់សារធាតុគីមីមួយកន្លែងនៅភូមិ១០ សង្កាត់បឹងកក់ទី២ ខណ្ឌទួលគោក។ ក្រោយមកទីតាំងនេះបានដំណើរការលក់ឡើងវិញ ដែលធ្វើឲ្យអាវុធហត្ថចុះបង្ក្រាបសារជាថ្មី។

អ្វីដែលគួរឲ្យភ្ញាក់ផ្អើលនោះ គឺនៅពេលអាវុធហត្ថចុះទៅបង្ក្រាប បានរកឃើញថា មានជនសង្ស័យ០១ក្រុម បានដើរតួជាសមត្ថកិច្ចអាវុធហត្ថនិងជាអ្នកកាសែត ទៅបញ្ចុះបញ្ចូលម្ចាស់ទីតាំងឲ្យបើកលក់ឧបករណ៍អេឡិចត្រូនិកឡើងវិញ ជាថ្នូរនឹងទឹកប្រាក់៥៦០០ដុល្លារអាមេរិក។

ជនសង្ស័យទាំងនោះបានធានាថា នឹងមិនធ្វើការបង្ក្រាប និងមិនបង្ហោះផ្សព្វផ្សាយលើបណ្តាញសង្គម។ ម្ចាស់ទីតាំងបានសហការជាមួយអាវុធហត្ថ ហើយការស្រាវជ្រាវបាននាំឲ្យឃាត់ខ្លួនជនសង្ស័យបាន០៣នាក់។

ជនសង្ស័យទាំង៣នាក់មានឈ្មោះ ព្រំ សៅសំណាង (២២ឆ្នាំ), អ៊ុំ វិសាល (២៣ឆ្នាំ) និង អ៊ុយ សុខហេង (២១ឆ្នាំ)។ ពួកគេបានសារភាពថា ពិតជាបានដើរតួជាសមត្ថកិច្ចអាវុធហត្ថនិងជាអ្នកកាសែត ដើម្បីបញ្ចុះបញ្ចូលនិងកំហែងយកប្រាក់ពីម្ចាស់ទីតាំង។

ជនសង្ស័យទាំង៣នាក់ត្រូវបានកសាងសុំណុំរឿងបញ្ជូនទៅតុលាការ ចំណែកឯបក្ខពួកម្នាក់ទៀតឈ្មោះ ថោល វណ្ណថុន កំពុងរត់គេចខ្លួន ហើយអាវុធហត្ថកំពុងស្រាវជ្រាវឃាត់ខ្លួនបន្ត។

លោកឧត្តមសេនីយ៍ឯក រ័ត្ន ស៊្រាង មេបញ្ជាការរងកងរាជអាវុធហត្ថលើផ្ទៃប្រទេស បានអំពាវនាវដល់មហាជនទូទៅ បើបានដឹងឬជួបករណីដូចខាងលើ សូមរាយការណ៍ទៅកាន់អាវុធហត្ថរាជធានីភ្នំពេញ តាមរយៈលេខទូរស័ព្ទបន្ទាន់ ១២៩១ ឬទាក់ទងតាមបណ្តាញសង្គម។

ការចុះបង្ក្រាបនេះស្របតាមបទបញ្ជារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងគោលបំណងទប់ស្កាត់ការលក់ឧបករណ៍អេឡិចត្រូនិកសម្រាប់ជក់សារធាតុគីមី ដើម្បីការពារសុខភាពសាធារណៈ ជាពិសេសសុខភាពអ្នកសិក្សា។