By ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសពីការត្រៀមខ្លួនពេញលេញ ដើម្បីទទួលស្វាគមន៍ពលករខ្មែរដែលត្រឡប់មកពីប្រទេសថៃ ដោយមានការងាររាប់ម៉ឺនកន្លែងរង់ចាំផ្ដល់ជូន។
លោក ស៊ុន មេសា អ្នកនាំពាក្យក្រសួងការងារ បានបញ្ជាក់ថា៖ “យើងមានការងាររាប់ម៉ឺនកន្លែងសម្រាប់បងប្អូនពលករដែលត្រឡប់មកស្រុកវិញ។ ប្រាក់ខែនៅកម្ពុជាឥឡូវនេះក៏ខ្ពស់ប្រហាក់ប្រហែលនឹងប្រទេសថៃដែរ ហើយមានសេវាសុខភាពតាមរយៈបេឡាជាតិសន្ដិសុខសង្គម ធានារ៉ាប់រងគ្រោះថ្នាក់ការងារ និងប្រាក់សោធន។”
លោកបានអំពាវនាវឱ្យពលករខ្មែរវិលត្រឡប់មកមាតុភូមិមុនពេលមានការបណ្តេញចេញពីអាជ្ញាធរថៃ ដើម្បីចៀសវាងបញ្ហាផ្សេងៗ។ រាជរដ្ឋាភិបាលត្រៀមខ្លួនទទួលស្វាគមន៍ពលករទាំងអស់ ទោះបីជាមាន ឬគ្មានឯកសារស្របច្បាប់ក៏ដោយ។
គួរបញ្ជាក់ថា រហូតមកដល់ពេលនេះ អតីតពលករខ្មែរជាង ៦៥ម៉ឺននាក់ដែលត្រឡប់មកពីថៃ ក្នុងចំណោមជាង ៨០នាក់ទទួលបានការងារ។ ក្នុងនោះ ជាង ៣៣ម៉ឺននាក់កំពុងធ្វើការងារក្នុងប្រព័ន្ធ និងជាង ៣២ម៉ឺននាក់ទទួលបានការងារនៅក្រៅប្រព័ន្ធ។
លោក ស៊ុន មេសា បានពន្យល់បន្ថែមថា៖ “នៅថៃ ពលករខ្មែរដែលគ្មានឯកសារគ្រប់គ្រាន់ មិនមានសេវាសុខភាព ឬការធានារ៉ាប់រងអ្វីទាំងអស់។ តែនៅកម្ពុជា ពួកគាត់ទទួលបានការការពារពេញលេញតាមច្បាប់។”
ក្រសួងការងារបានរៀបចំគម្រោងជំនួយពិសេសសម្រាប់ពលករដែលត្រឡប់មកស្រុក រួមមានការបណ្ដុះបណ្ដាលជំនាញ ការណែនាំការងារ និងសេវាសុខភាព។ ការងារដែលត្រៀមផ្ដល់ជូនមានច្រើនវិស័យ រួមមានកសិកម្ម ឧស្សាហកម្ម និងសេវាកម្ម។
រដ្ឋាភិបាលកម្ពុជាបន្តអំពាវនាវឱ្យពលករខ្មែរទាំងអស់ដែលនៅថៃដោយគ្មានឯកសារស្របច្បាប់ វិលត្រឡប់មកមាតុភូមិវិញ ដើម្បីទទួលបានការការពារ និងឱកាសការងារដ៏ល្អ។
ដោយ៖ តារា
