អារ៉ាប់រួមទាមទារសំណងរាប់លានដុល្លារពីអ៊ីរ៉ង់ បន្ទាប់ពីការវាយប្រហារជាបន្តបន្ទាប់

ទីប្រឹក្សាការទូតរបស់ប្រធានាធិបតីអារ៉ាប់រួម (UAE) លោក Anwar Gargash បានប្រកាសទាមទារសំណងពីអ៊ីរ៉ង់ បន្ទាប់ពីការវាយប្រហារជាបន្តបន្ទាប់របស់ទីក្រុងតេហេរ៉ង់លើប្រទេសនេះ។ ការទាមទារនេះបានកើតឡើងក្រោយពីសង្គ្រាមបានផ្ទុះឡើងនៅចុងខែកុម្ភៈកន្លងទៅ។

តាមការបង្ហោះនៅលើបណ្តាញសង្គម X លោក Gargash បានអះអាងថា៖ «ដំណោះស្រាយនយោបាយណាមួយត្រូវតែមានការធានាច្បាស់លាស់ ដើម្បីទប់ស្កាត់ការវាយប្រហារជាថ្មីទៀតនាពេលអនាគត និងទាមទារសំណងពីអ៊ីរ៉ង់សម្រាប់ការកំណត់គោលដៅលើជនស៊ីវិល និងហេដ្ឋារចនាសម្ព័ន្ធស៊ីវិលសំខាន់ៗ»។

អារ៉ាប់រួមបានចោទប្រកាន់អ៊ីរ៉ង់ថា «បោកបញ្ឆោត» ប្រទេសជិតខាង និងបង្ហាញពី«ការវាយប្រហារដែលបានរៀបចំទុកជាមុន» ទោះបីជាមានការខិតខំប្រឹងប្រែងដើម្បីបញ្ចៀសវាក៏ដោយ។

ការទាមទារសំណងរបស់ UAE បានកើតឡើងបន្ទាប់ពីអ៊ីរ៉ង់ទាមទារសំណងពីសហរដ្ឋអាមេរិក និងអ៊ីស្រាអែល។ លោក Amir Saeid Iravani ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ បានអះអាងថា ការសម្រេចចិត្តរបស់អារ៉ាប់រួមគឺជា«ទង្វើខុសឆ្គងអន្តរជាតិ»។

អារ៉ាប់រួមគឺជាដៃគូពាណិជ្ជកម្មធំទីពីររបស់អ៊ីរ៉ង់ បន្ទាប់ពីចិន។ ប៉ុន្តែបន្ទាប់ពីអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់ ប្រទេសអារ៉ាប់រួមបានក្លាយជាគោលដៅអាទិភាពនៃការសងសឹករបស់អ៊ីរ៉ង់។

អត្ថបទ៖ សាង ស្រីល័ក្ខ