By ភ្នំពេញ៖ ក្រសួងសុខាភិបាលបានប្រកាសពីករណីជំងឺផ្តាសាយបក្សី H5N1 លើកុមារអាយុ៣ឆ្នាំម្នាក់នៅស្រុកបន្ទាយអំពិល ខេត្តឧត្តរមានជ័យ។ ករណីនេះត្រូវបានបញ្ជាក់ដោយវិទ្យាស្ថានជាតិសុខភាពសាធារណៈនៅថ្ងៃទី២៩ មីនា ២០២៦។
អ្នកជំងឺមានទីលំនៅនៅភូមិទំនប់ថ្មី ឃុំបេង ដែលត្រូវបានដាក់សម្រាកដាច់ដោយឡែកនៅមន្ទីរពេទ្យ និងទទួលការព្យាបាលយ៉ាងយកចិត្តទុកដាក់។ តាមការស៊ើបអង្កេតបានរកឃើញថា នៅផ្ទះអ្នកជំងឺមានចិញ្ចឹមមាន់និងទា ដែលមានមាន់ឈឺនិងងាប់មួយចំនួន ហើយកុមារបានលេងនៅជុំវិញកន្លែងទាំងនោះ។
ក្រុមឆ្លើយតបបន្ទាន់របស់ក្រសួងសុខាភិបាលបានសហការជាមួយមន្ទីរកសិកម្មខេត្ត និងអាជ្ញាធរមូលដ្ឋាន ដើម្បីអង្កេតស្រាវជ្រាវ ស្វែងរកប្រភពចម្លង និងទប់ស្កាត់ការឆ្លងបន្ត។ ពួកគេក៏បានចែកជូនឱសថតាមីហ្គូ (Tamiflu) ដល់អ្នកប៉ះពាល់ជិតស្និទ្ធ។
ក្រសួងសុខាភិបាលបានអំពាវនាវឱ្យប្រជាពលរដ្ឋប្រុងប្រយ័ត្នលើជំងឺផ្តាសាយបក្សី H5N1 ដែលនៅតែគំរាមកំហែងសុខភាព។ ប្រសិនបើមានអាការៈក្តៅខ្លួន ក្អក ហូរសំបោរ ឬពិបាកដកដង្ហើម ហើយមានប្រវត្តិប៉ះពាល់ជាមួយមាន់ទាឈឺក្នុងរយៈពេល១៤ថ្ងៃមុន សូមស្វែងរកការព្យាបាលភ្លាមៗ។
ជំងឺផ្តាសាយបក្សី H5N1 អាចចម្លងពីសត្វបក្សីទៅមនុស្សតាមការប៉ះពាល់ជិតស្និទ្ធ។ ដើម្បីបង្ការ សូម៖
• កុំប៉ះពាល់មាន់ទាឈឺឬងាប់
• ពាក់ស្រោមដៃនិងម៉ាសការពារពេលចាប់កាន់សត្វ
• លាងដៃញឹកញាប់ ជាពិសេសបន្ទាប់ពីប៉ះពាល់សត្វ
• ចម្អិនសាច់សត្វបក្សីនិងស៊ុតឱ្យឆ្អិនល្អ
• ទុកអាហារឆៅនិងឆ្អិនដាច់ដោយឡែកពីគ្នា
សម្រាប់ព័ត៌មានបន្ថែម សូមទាក់ទងលេខទូរសព្ទទាន់ហេតុការណ៍លេខ១១៥ ដោយឥតគិតថ្លៃ ឬចូលទស្សនាគេហទំព័រ www.moh.gov.kh និង www.cdcmoh.gov.kh។
