ប្រធានបក្សប្រឆាំងតៃវ៉ាន់ទទួលយកការអញ្ជើញទៅចិន ស្វែងរកសន្តិភាពនៅច្រកសមុទ្រ

ភ្នំពេញ – លោកស្រី Cheng Li-wun ប្រធានគណបក្ស Kuomintang ដែលជាបក្សប្រឆាំងធំជាងគេនៅតៃវ៉ាន់ បានសម្រេចចិត្តទទួលយកការអញ្ជើញពីលោកប្រធានាធិបតីស៊ី ជិនពីង ដើម្បីធ្វើទស្សនកិច្ចនៅចិនដីគោកក្នុងខែមេសាខាងមុខ។

លោកស្រី Cheng ដែលទើបតែជាប់ឆ្នោតជាប្រធានបក្សកាលពីខែតុលាឆ្នាំមុន បានបង្ហាញពីសញ្ញាចង់ពង្រឹងទំនាក់ទំនងជាមួយក្រុងប៉េកាំងឱ្យកាន់តែរឹងមាំ។ នេះជាជំហានសំខាន់ក្នុងការស្វែងរកដំណោះស្រាយសន្តិភាពនៅតំបន់ច្រកសមុទ្រតៃវ៉ាន់។

យោងតាមទីភ្នាក់ងារព័ត៌មានរ៉យទ័រ ដំណើរទស្សនកិច្ចនេះនឹងប្រព្រឹត្តទៅចាប់ពីថ្ងៃទី៧ ដល់ថ្ងៃទី១២ ខែមេសា នៅទីក្រុងប៉េកាំង សៀងហៃ និងខេត្តជាំងស៊ូ។ ជំនួបនេះកើតឡើងមុនពេលប្រធានាធិបតីអាមេរិកលោកដូណាល់ត្រាំធ្វើដំណើរទៅក្រុងប៉េកាំងសម្រាប់កិច្ចប្រជុំកំពូល។

ក្នុងសេចក្តីថ្លែងការណ៍ផ្លូវការនៅថ្ងៃទី៣០មីនា គណបក្ស Kuomintang បានបញ្ជាក់ថា លោកស្រី Cheng បានទទួលយកការអញ្ជើញនេះដោយក្តីរីករាយ ដើម្បីឱ្យបក្សទាំងពីរអាចសហការគ្នាក្នុងការរក្សាសន្តិភាព។

រដ្ឋាភិបាលក្រុងប៉េកាំងបានបដិសេធការចរចាជាមួយប្រធានាធិបតីតៃវ៉ាន់បច្ចុប្បន្នលោកឡៃឈីងតេ ដោយចោទលោកថាជាជនផ្ដាច់ខ្លួន។ ទស្សនកិច្ចរបស់លោកស្រី Cheng ត្រូវបានគេមើលឃើញថាជាឱកាសសំខាន់ក្នុងការស្វែងរកផ្លូវចរចាថ្មី។