កម្ពុជា-ជប៉ុន ពង្រីកសហប្រតិបត្តិការ បើកឱកាសពលករខ្មែរទៅធ្វើការនៅជប៉ុនកាន់តែច្រើន

ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ កំពុងពង្រឹងសហប្រតិបត្តិការជាមួយសមាគមកម្ពុជា-ជប៉ុន (JCA) ដើម្បីបើកឱកាសការងារ និងការបញ្ជូនពលករខ្មែរទៅធ្វើការនៅប្រទេសជប៉ុនកាន់តែច្រើនឡើង។

ក្នុងជំនួបពិសេសនាថ្ងៃទី៣១ ខែមីនា ឆ្នាំ២០២៦ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជួបពិភាក្សាជាមួយលោក តាកាហាស៊ី ហ្វូមីអាគី (Takahashi Fumiaki) ប្រធានសមាគម JCA និងសហការី ដើម្បីពង្រឹងកិច្ចសហប្រតិបត្តិការក្នុងការអភិវឌ្ឍធនធានមនុស្ស។

លោករដ្ឋមន្ត្រី ហេង សួរ បានសង្កត់ធ្ងន់ពីសក្តានុពលក្នុងការបញ្ជូនពលករខ្មែរទៅធ្វើការនៅជប៉ុន ដោយលើកឡើងថា៖ “កម្ពុជាចង់ឃើញមានការបញ្ជូនពលករខ្មែរទៅធ្វើការនៅប្រទេសជប៉ុនកាន់តែច្រើនឡើង និងពង្រឹងសមត្ថភាពយុវជនតាមរយៈការបណ្ដុះបណ្ដាលវិជ្ជាជីវៈ (TVET)។”

ភាគីទាំងពីរបានពិភាក្សាពីវិធីសាស្រ្តពង្រឹងការបណ្ដុះបណ្ដាលភាសាជប៉ុន ជាពិសេសពាក្យបច្ចេកទេស ដើម្បីជំរុញឱ្យពលករខ្មែរអាចសម្របខ្លួនបានលឿននៅជប៉ុន។ លោករដ្ឋមន្ត្រីក៏បានលើកទឹកចិត្តឱ្យ JCA ពិចារណាស្វែងរកវិធីសាស្រ្តគន្លឹះក្នុងការបណ្ដុះបណ្ដាលភាសាឱ្យកាន់តែងាយស្រួល។

លោក តាកាហាស៊ី ហ្វូមីអាគី បានថ្លែងអំណរគុណចំពោះការគាំទ្រពីក្រសួង និងបញ្ជាក់ថា JCA ចង់ពង្រីកកិច្ចសហការជាមួយក្រសួងការងារ ជាពិសេសក្នុងការអភិវឌ្ឍធនធានមនុស្ស និងការបញ្ជូនពលករខ្មែរទៅជប៉ុន។

“ជប៉ុនកំពុងខ្វះខាតកម្លាំងពលកម្មវ័យក្មេង ហើយកិច្ចសហការនេះនឹងផ្តល់ផលប្រយោជន៍ដល់ប្រទេសទាំងពីរ” លោក តាកាហាស៊ី បានអះអាង។

ក្រសួងការងារក៏បានជម្រាបជូនពីការពង្រឹងកិច្ចសហប្រតិបត្តិការជាមួយដៃគូជាច្រើន រួមមានក្រុមហ៊ុន Toyota ជប៉ុន ដែលនឹងជួយពង្រឹងសមត្ថភាពពលករខ្មែរ និងបើកឱកាសការងារថ្មីៗ។

កិច្ចសហប្រតិបត្តិការនេះមានសារៈសំខាន់ក្នុងការអភិវឌ្ឍធនធានមនុស្សឱ្យមានសមត្ថភាពខ្ពស់ និងពិតជាចាំបាច់សម្រាប់ការអភិវឌ្ឍប្រទេសទាំងពីរ។ ក្រសួងស្វាគមន៍ចំពោះរាល់កិច្ចសហប្រតិបត្តិការដែលអាចជួយបំពេញបន្ថែមទៅលើការបណ្ដុះបណ្ដាលធនធានមនុស្សនៅកម្ពុជា។

ជំនួបនេះបង្ហាញពីឆន្ទៈរបស់ភាគីទាំងពីរក្នុងការពង្រឹងទំនាក់ទំនងសហប្រតិបត្តិការ និងបើកឱកាសថ្មីៗសម្រាប់យុវជនកម្ពុជាទៅធ្វើការ និងទទួលបទពិសោធន៍នៅប្រទេសជប៉ុន។

ដោយ៖ តារា