By រាជធានីភ្នំពេញ៖ ក្រុមហ៊ុន Grab បានប្រកាសគោលនយោបាយថ្មីសម្រាប់ដៃគូបើកបរកង់បី (Tuk Tuk) ដោយកាត់បន្ថយកម្រៃសេវាបណ្តោះអាសន្នចំនួន ៥% និង ១០% តាមរយៈការផ្តល់ប្រាក់ត្រលប់ (Cashback) ដើម្បីជួយសម្រាលបន្ទុកលើការឡើងថ្លៃហ្គាស (LPG) និងសាំង។
យោងតាមការប្រកាសនៅថ្ងៃទី៣០ ខែមីនា ឆ្នាំ២០២៦ ក្រុមហ៊ុន Grab បានផ្លាស់ប្តូរពីការផ្តល់ប្រាក់លើកទឹកចិត្តថេរចំនួន ៣០០ រៀលក្នុងមួយជើង មកជាទម្រង់ Cashback ដោយកាត់បន្ថយកម្រៃសេវាចំនួន ៥% សម្រាប់ការដឹកចាប់ពី ១ ដល់ ១៩ ជើងក្នុងមួយថ្ងៃ និង ១០% សម្រាប់ការដឹកចាប់ពី ២០ ជើងឡើងទៅ។
លោក កង សុវណ្ណារ៉ូត (Mike) នាយកគ្រប់គ្រងក្រុមហ៊ុន Grab ប្រចាំប្រទេសកម្ពុជា និងមីយ៉ាន់ម៉ា បានអះអាងថា៖ “ដៃគូបើកបររបស់យើងគឺជាឆ្អឹងខ្នងនៃសេវាកម្មរបស់យើង។ យើងប្តេជ្ញាឈរនៅក្បែរពួកគាត់ជានិច្ច នៅពេលពួកគាត់ប្រឈមនូវពេលវេលាដ៏លំបាកទាំងនេះ។”
ក្រៅពីការកាត់បន្ថយកម្រៃសេវា ក្រុមហ៊ុន Grab ក៏បានផ្តល់ប័ណ្ណសាំងនិងហ្គាសដែលមានតម្លៃ ៥ ដុល្លារ, ១០ ដុល្លារ និង ១៥ ដុល្លារ ដល់ដៃគូបើកបរឆ្នើមជាង ២,០០០ នាក់ជារៀងរាល់សប្តាហ៍។ ប័ណ្ណទាំងនេះត្រូវបានបង្កើតឡើងដើម្បីជួយកាត់បន្ថយការចំណាយផ្ទាល់ខ្លួនប្រចាំថ្ងៃ។
ជាងនេះទៀត ក្រុមហ៊ុន Grab បានសហការជាមួយក្រុមហ៊ុនកូកាកូឡា និងស្ថានីយប្រេងឥន្ធនៈតេលាខ្មែរចំនួន ១១ ទីតាំង ក្នុងរាជធានីភ្នំពេញ ដើម្បីចែកជូនភេសជ្ជៈចំនួន ៨៥,០០០ កំប៉ុងដល់ដៃគូបើកបរ។
ការគាំទ្រទាំងនេះគឺជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយផលប៉ះពាល់លើថ្លៃធ្វើដំណើររបស់អ្នកដំណើរ និងជួយបង្ការសម្ពាធអតិផរណាបន្ថែមដល់សហគមន៍ទាំងមូល។
សម្រាប់ដៃគូបើកបរដែលចង់ជ្រាបព័ត៌មានបន្ថែម សូមពិនិត្យមើលកម្មវិធី Grab Driver និងសារជូនដំណឹងក្នុង App ដើម្បីដឹងពីលក្ខខណ្ឌទទួលបាន កាលវិភាគចែកប័ណ្ណសាំងនិងហ្គាស និងទីតាំងស្ថានីយប្រេងឥន្ធនៈតេលាខ្មែរដែលចូលរួម។
ក្រុមហ៊ុន Grab ដែលមានទីស្នាក់ការកណ្តាលនៅប្រទេសសិង្ហបុរី បម្រើសេវាកម្មជាង ៨០០ ទីក្រុងនៅបណ្តាប្រទេសក្នុងតំបន់អាស៊ីអាគ្នេយ៍ រួមមានកម្ពុជា ឥណ្ឌូនេស៊ី ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។
