By ខេត្តកណ្ដាល៖ អាជ្ញាធរក្រុងអរិយក្សត្របានចុះអនុវត្តវិធានការរដ្ឋបាលយ៉ាងតឹងរឹង ក្រោយរកឃើញសំណង់មួយកន្លែងសាងសង់ដោយខុសច្បាប់ ដោយគ្មានលិខិតអនុញ្ញាតសាងសង់ និងលិខិតបើកការដ្ឋានសាងសង់ណាមួយ។
លោក ចាន់ តារា អភិបាលក្រុងអរិយក្សត្រ បានបញ្ជាឱ្យលោក ជា ហ៊ោ អភិបាលរង ដឹកនាំក្រុមការងារចុះពិនិត្យទីតាំងសំណង់នៅក្បាលដីលេខ ១៣៨៩ ភូមិអរិយក្សត្រ សង្កាត់អរិយក្សត្រ ក្រុងអរិយក្សត្រ។ ការពិនិត្យបានបង្ហាញថា សំណង់នេះជាកម្មសិទ្ធិរបស់លោក លីវ តុងមីន និងលោក ឡេង ខេង។
រដ្ឋបាលក្រុងបានចេញសេចក្តីជូនដំណឹងជាច្រើនលើកដល់ម្ចាស់សំណង់ តម្រូវឱ្យផ្អាកការសាងសង់ ប៉ុន្តែម្ចាស់សំណង់នៅតែបន្តសាងសង់ដោយលួចលាក់។ ថ្ងៃទី៣០ មីនា ២០២៦ អាជ្ញាធរបានណែនាំម្តងទៀត ប៉ុន្តែម្ចាស់សំណង់នៅតែមិនសហការ។
អាជ្ញាធរបានចេញសេចក្តីជូនដំណឹងផ្អាកការសាងសង់គិតចាប់ពីថ្ងៃនេះតទៅ។ ប្រសិនបើមិនអនុវត្តតាម អាជ្ញាធរនឹងចុះរុះរើសំណង់ ដោយមិនទទួលខុសត្រូវចំពោះការខូចខាតណាមួយ។ ករណីរឹងរូស នឹងត្រូវបញ្ជូនទៅតុលាការដើម្បីចាត់ការតាមច្បាប់។
រដ្ឋបាលក្រុងអរិយក្សត្រក៏បានអំពាវនាវដល់ប្រជាពលរដ្ឋ និងម្ចាស់គម្រោងសំណង់ទាំងអស់ សូមគោរពតាមនីតិវិធីច្បាប់ ធ្វើការស្នើសុំអនុញ្ញាតច្បាប់ឱ្យបានត្រឹមត្រូវមុនពេលសាងសង់ ដើម្បីចៀសវាងការប្រឈមមុខនឹងវិធានការផ្លូវច្បាប់។
ដោយ៖ តារា
