By ខេត្តបន្ទាយមានជ័យ៖ គ្រោះថ្នាក់ចរាចរណ៍ធ្ងន់ធ្ងរបានកើតឡើងនៅថ្ងៃទី៣១ ខែមីនា ឆ្នាំ២០២៦ តាមផ្លូវជាតិលេខ៥ នៅភូមិនិមិត្ត២ សង្កាត់និមិត្ត ក្រុងប៉ោយប៉ែត នៅពេលរថយន្តដឹកទឹកកកបុកជាមួយរថយន្តកាមរី រុលទៅបុកសំយ៉ាបផ្ទះខូចខាត និងបណ្តាលរបួសម្នាក់។
អ្នកឃើញហេតុការណ៍បានប្រាប់ថា នៅពេលគ្រោះថ្នាក់កើតឡើង មានរថយន្តម៉ាក់ហ៊ីយិនដាយពាក់ផ្លាក់លេខបាត់ដំបង 3A-3103 ដឹកទឹកកកថ្មគោល បានបើកបរទិសដៅពីកើតមកលិច ឡើងវ៉ាជេញរ៉េចង្កូតទៅបុករថយន្តកាមរី ដែលបើកបរទិសដៅបញ្ច្រាសគ្នាពីលិចមកកើត ពេញទំហឹងរុលទៅបុកសំយ៉ាបផ្ទះបញ្ញើទំនិញវីរៈប៊ុនថាំ បណ្តាលរបួសម្នាក់ស្រាល។
ក្រោយគ្រោះថ្នាក់ចរាចរណ៍កើតឡើង ឃើញកម្លាំងនគរបាលចរាចរណ៍ផ្លូវគោកក្រុងប៉ោយប៉ែត បានចុះពិនិត្យនិងវាស់វែងបញ្ជាក់ថា មូលហេតុដែលបង្កគ្រោះថ្នាក់គឺរថយន្តដឹកទឹកកកបើកបរឡើងជែងគ្មានការប្រុងប្រយ័ត្ន ទើបបុករ៉ខូចខាត បណ្តាលរបួសអ្នកបើកបរម្នាក់ស្រាល និងខូចខាតរថយន្ត២គ្រឿង និងសំយ៉ាបផ្ទះ។
ក្រោយពិនិត្យវាស់វែងហើយ កម្លាំងនគរបាលបានយករថយន្តទាំង២គ្រឿងទៅរក្សាទុក ដើម្បីដោះស្រាយគ្នាតាមច្បាប់។ ហេតុការណ៍នេះបង្ហាញពីសារៈសំខាន់នៃការប្រុងប្រយ័ត្នក្នុងការបើកបរ ជាពិសេសនៅតាមផ្លូវជាតិដែលមានចរាចរណ៍ច្រើន។
អត្ថបទសរសេរដោយ ប៊ុន ធឿន
កែសម្រួលដោយ ធីតា
