ប្រធានាធិបតីអេហ្ស៊ីបអង្វរត្រាំបញ្ឈប់សង្គ្រាមអ៊ីរ៉ង់ ព្រោះខ្លាចតម្លៃប្រេងហក់ដល់២០០ដុល្លារ

នៅក្នុងពិព័រណ៍ថាមពលអេហ្ស៊ីបឆ្នាំ២០២៦ លោកប្រធានាធិបតី អាប់ឌុល ហ្វាតាស់ អាល់ស៊ីស៊ី បានធ្វើការអំពាវនាវយ៉ាងទទូចទៅកាន់លោកប្រធានាធិបតីអាមេរិក ដូណាល់ ត្រាំ ឲ្យជួយអន្តរាគមន៍បញ្ឈប់សង្គ្រាមដែលកំពុងឆាបឆេះយ៉ាងខ្លាំងនៅក្នុងតំបន់ឈូងសមុទ្រ។

យោងតាមរ៉យទ័រ ចុះផ្សាយថ្ងៃទី៣១ខែមីនាឆ្នាំ២០២៦ លោកស៊ីស៊ីបានសង្កត់ធ្ងន់ថា មានតែមេដឹកនាំអាមេរិករូបនេះតែម្នាក់គត់ ដែលមានអំណាចនិងសមត្ថភាពគ្រប់គ្រាន់ក្នុងការទប់ស្កាត់មហន្តរាយនេះ កុំឲ្យរីករាលដាលកាន់តែធំ។ លោកបានរំឮកផងដែរថា កាលពីមុន លោកត្រាំក៏ធ្លាប់បានជួយបញ្ចប់ជម្លោះនៅតំបន់ហ្គាហ្សាបានសម្រេច រួចមកហើយ ដូច្នេះលោកសង្ឃឹមថា កិច្ចខិតខំប្រឹងប្រែងផ្នែកការទូតស្រដៀងគ្នានេះ នឹងអាចកើតមានម្តងទៀតដើម្បីសង្គ្រោះពិភពលោក។

ក្តីកង្វល់ដ៏ធំបំផុតដែលមេដឹកនាំអេហ្ស៊ីបបានលើកឡើង គឺការហក់ឡើងនៃតម្លៃប្រេងដែលអាចឡើងដល់លើសពី២០០ដុល្លារក្នុងមួយបារ៉ែល បើសង្គ្រាមនៅតែបន្ត។ លោកបានពន្យល់យ៉ាងសាមញ្ញថា ការវាយប្រហារទៅលើរោងចក្រចម្រាញ់ប្រេង និងកន្លែងផ្ទុកថាមពលនានា នឹងធ្វើឲ្យពិភពលោកខ្វះខាតប្រេងយ៉ាងធ្ងន់ធ្ងរ ដែលវានឹងក្លាយជាសោកនាដកម្មសេដ្ឋកិច្ចសម្រាប់ប្រទេសដែលមានចំណូលមធ្យម និងប្រទេសដែលកំពុងជួបការលំបាក។

លើសពីបញ្ហាប្រេងឥន្ធនៈទៅទៀត លោកស៊ីស៊ីក៏បានព្រមានអំពីវិបត្តិស្បៀងអាហារសកល ដែលអាចកើតចេញពីការកាត់ផ្ដាច់ការនាំចេញជីកសិកម្មផងដែរ។

ក្នុងពេលជាមួយគ្នានេះ អគ្គលេខាធិការនៃក្រុមប្រឹក្សាសហប្រតិបត្តិការឈូងសមុទ្រ លោក Jasem Mohamed Albudaiwi ក៏បានចេញមុខមកថ្កោលទោសយ៉ាងខ្លាំងចំពោះសកម្មភាពឈ្លានពានរបស់អ៊ីរ៉ង់ ជាពិសេសការបិទច្រកសមុទ្រហ័រមូស (Hormuz)។ លោកបានចាត់ទុកទង្វើនេះថា ជាការបំពានច្បាប់អន្តរជាតិយ៉ាងធ្ងន់ធ្ងរ និងជាការគំរាមកំហែងដោយផ្ទាល់ទៅលើសន្តិសុខថាមពលរបស់មនុស្សជាតិទាំងមូល៕