ណេតាន់យ៉ាហ៊ូប្រកាសបន្តសង្គ្រាមប្រឆាំងអ៊ីរ៉ង់ ដោយអះអាងថា ‘យើងនឹងកម្ទេចរបបភេរវកម្ម’

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសយ៉ាងច្បាស់ថា អ៊ីស្រាអែលនឹងបន្តយុទ្ធនាការយោធាប្រឆាំងនឹងអ៊ីរ៉ង់ ដោយចាត់ទុកការវាយប្រហារនេះជា “ការកម្ទេចរបបភេរវកម្ម”។

ការប្រកាសនេះធ្វើឡើងក្រោយពីប្រធានាធិបតីអ៊ីរ៉ង់ លោក Masoud Pezeshkian បានលើកឡើងពីឆន្ទៈបញ្ចប់សង្គ្រាម ប៉ុន្តែទាមទារការធានាថាជម្លោះនឹងមិនកើតឡើងម្តងទៀត។

លោក ណេតាន់យ៉ាហ៊ូ បានអះអាងក្នុងសេចក្តីថ្លែងការណ៍ថា៖ «យុទ្ធនាការនេះមិនទាន់ចប់នៅឡើយទេ។ យើងនឹងបន្តកម្ទេចរបបភេរវកម្មអ៊ីរ៉ង់»។ លោកបន្ថែមថា៖ «យើងត្រូវតែធ្វើសកម្មភាព ហើយយើងបានធ្វើសកម្មភាពរួចហើយ»។

សង្គ្រាមនេះចាប់ផ្តើមនៅថ្ងៃទី២៨ កុម្ភៈ ដោយអ៊ីស្រាអែលនិងសហរដ្ឋអាមេរិកបានសម្លាប់មេដឹកនាំកំពូលអ៊ីរ៉ង់ លោក អាយ៉ាតូឡាស់ អាលី ខាមេណៃ និងបង្កឱ្យមានរលកនៃការវាយប្រហារសងសឹកនៅទូទាំងតំបន់មជ្ឈិមបូព៌ា។

ចំណែកលោក Yair Lapid មេដឹកនាំគណបក្សប្រឆាំង បានរិះគន់ការអះអាងរបស់លោក ណេតាន់យ៉ាហ៊ូ ដែលថា «ខ្ញុំបានផ្លាស់ប្តូរមជ្ឈិមបូព៌ា»។ លោក Lapid បានឆ្លើយតបថា៖ «អ្នកស្ទើរតែបានផ្លាស់ប្តូរមជ្ឈិមបូព៌ាហើយ តែនៅទីបំផុតវាបានបង្ហាញថាគ្មានការផ្លាស់ប្តូរអីទេ»។

ការប្រកាសរបស់នាយករដ្ឋមន្ត្រីអ៊ីស្រាអែលនេះ កើតឡើងក្នុងពេលដែលតំបន់មជ្ឈិមបូព៌ាកំពុងជួបប្រទះនូវភាពតានតឹងយោធាខ្ពស់បំផុតក្នុងប្រវត្តិសាស្រ្តថ្មី។